યુવતીઓ માટે કારકિર્દીની નવી ક્ષિતિજ - ક્રિકેટ

કચ્છમાં રમત-ગમત માટે વધુ અદ્યતન સુવિધાઓ નથી. ધીરે ધીરે ગ્રામ્ય કે શહેરી સ્તરે સુવિધાઓ વધી રહી હોવા છતાં મોટાં શહેરોની સરખામણીમાં તદ્દન નહીંવત સુવિધા છે. કોઈ યુવાનને રમત-ગમતમાં જ પોતાની કારકિર્દી બનાવવી હોય તો તેને વધુ ટ્રેનિંગ લેવા કચ્છ બહાર જવું પડે છે, ત્યારે યુવતીઓ માટે તો રમત-ગમતમાં આગળ વધવું એ તો એ લોઢાના ચણા ચાવવા સમાન છે. આવી સ્થિતિ હોવા છતાં આજે કચ્છની યુવતીઓમાં ક્રિકેટ જેવી પુરુષોની રમતમાં રસ વધવા લાગ્યો છે.

- સુચિતા બોઘાણી કનર

કચ્છની યુવતીઓ ક્રિકેટની પદ્ધતિસરની તાલીમ લઈને ઝોન, રાજ્ય સ્તરે મેચ રમવા લાગી છે. જો તેમને વધુ વ્યવસ્થિત તાલીમ મળે તો રાષ્ટ્રીય અને આંતરરાષ્ટ્રીય સ્તરે ચમકી શકે છે. કચ્છની યુવતીઓ સ્થાનિક મેચમાં લાઇવ કૉમેન્ટરી કરે છે. સ્કોરિંગ કે અમ્પાયરિંગ જેવી કામગીરી પણ બજાવવા માટે તાલીમ લેવા તેઓ તૈયાર છે. જોકે આ સ્થિતિનું નિર્માણ છેલ્લાં ૨-૪ વર્ષમાં જ થયું છે. તે પહેલાં તો મહિલાઓ ક્રિકેટ પ્રત્યે નહિવત્ રસ ધરાવતી હતી. કચ્છ ક્રિકેટ એસોસિયેશન સૌરાષ્ટ્ર ક્રિકેટ એસોસિયેશન સાથે સંલગ્ન છે. જેના નેજા હેઠળ યુવતીઓ ઝોન, સ્ટેટ લેવલ પર રમતી થઈ છે. આજે મહિલા પ્રિમિયર લીગ (ડબ્લ્યુ.પી.એલ.) રમાય છે ત્યારે કચ્છનાં નાનાં સેન્ટરોમાંથી આવતી પ્રતિભાશાળી યુવતીઓ માટે પણ ક્રિકેટના ક્ષેત્રમાં ઊજળી તકો વધી રહી છે.

કચ્છના ભુજ, ગાંધીધામ કે મસ્કા જેવાં સેન્ટરોમાં બહુ પહેલાંથી જ ક્રિકેટની તાલીમ અપાય છે, પરંતુ અત્યાર સુધી આ તાલીમ લેવા માટે યુવાનો જ આગળ આવતા હતા, પરંતુ છેલ્લાં ૨-૪ વર્ષોથી અહીં તાલીમ લેનારી યુવતીઓની સંખ્યા પણ વધી છે. બૉલિંગ, બેટિંગ, વિકેટકિપિંગની સાથે યુવતીઓ સ્કોરિંગ, અમ્પાયરિંગ, રેફરી, કૉમેન્ટરી જેવા ભરપૂર કમાણી કરાવી આપતાં પાસાંઓ તરફ પણ વળી રહી છે. આ ઉપરાંત ઝોન કક્ષાએ કે સ્ટેટ કક્ષાએ રમનારા ખેલાડીઓને શાળાઓ દ્વારા ૨ ગુણ વધુ અપાતા હોવાથી પણ એક આકર્ષણ ઊભું થાય છે. નેશનલ ક્રિકેટ એકૅડેમી, ક્રિકેટ એસોસિયેશન વગેરે પણ મહિલા ખેલાડીઓને વધુ ’ને વધુ પ્રોત્સાહન આપી રહ્યાં હોવાથી યુવતીઓમાં ક્રિકેટ પ્રત્યેનું આકર્ષણ વધી રહ્યું છે.