યમુનાના પૂરની સમસ્યા, રાજનીતિ અને વાસ્તવિકતા

દિલ્હીની ડ્રેનેજ સિસ્ટમ આટલા વરસાદને સહન કરી શકવા સક્ષમ નથી

પાટનગર દિલ્હીમાં યમુનાના પૂરની સાથે રાજકીય આક્ષેપબાજીના પણ ઘોડાપૂર આવ્યા હતા. તેનો સિલસિલો હજુ પણ ચાલુ છે. જોકે યમુનાના પૂરના પાણી ઓસરવાના ચાલુ થઈ ગયા છે. દિલ્હીના મુખ્યપ્રધાન અરવિંદ કેજરીવાલ અને ભાજપના નેતાઓ દિલ્હીની વિકટ પરિસ્થિતિ અંગે સામસામે આક્ષેપબાજી કરવામાં વ્યસ્ત હતા. બંનેના આક્ષેપોમાં થોડું તથ્ય હોય તો પણ એક વાત બહુ સ્પષ્ટ દેખાઈ આવી છે, તે એ છે કે છેલ્લાં લગભગ આઠ-નવ વર્ષથી દિલ્હીમાં આમ આદમી પાર્ટીનું શાસન છે અને તેણે દિલ્હીમાં કોઈ વહીવટી કામોમાં નક્કર કામગીરી કરી નથી. તેનું આ પરિણામ છે. જોકે આ સમસ્યા એટલી જૂની છે કે તેને માટે દિલ્હીમાં અગાઉ શાસનમાં રહેલા કોંગ્રેસ અને ભાજપને પણ દોષિત ઠરાવવા પડે, પરંતુ અરવિંદ કેજરીવાલની સરકાર વધુ જવાબદાર એટલા માટે છે કે તેમણે આ સમસ્યાની ઇરાદાપૂર્વક ઉપેક્ષા કરી છે.