કંકુ-ચોખા લગ્નમાં ઈશ્વરને કંકોતરી અને ઈશ્વરનાં આશીર્વચન

તમે જન્મ્યા ત્યારે ઈશ્વરના ઘરેથી પ્રેમ લઈને જ અહીં આવ્યા હતા. તમારા દામ્પત્યમાં આ પ્રેમનું સેવન કરજો.

અત્યાર તુલસીવિવાહ પછી ગુલાબી ઠંડીમાં લગ્નોની મોસમ ખીલી છે! જેમની સગાઈ થઈ છે એવાં યુવક-યુવતીઓનાં લગ્ન લેવાશે, ફરી શેરીઓ ઢોલ-શરણાઈના અવાજથી ગુંજવા લાગ્યા છે. આંગણે આસોપાલવનાં લીલાં તોરણો ઝૂલશે, ઉંબરે કંકુના લાલ થાપા લાગશે, દીવાલે રૂડા ગણપતિ ચીતરાશે. અવસરમાં સૌ સગાં-વ્હાલાં સામેલ થશે, પણ આ બધાં શુભ કાર્યો પહેલાં તો લગ્નની કંકોતરીઓ છપાતી હોય છે. કંકોતરી એટલે લગ્ન થતાં હોય એ દીકરા-દીકરીઓના પરિવારના હરખનાં તેડાં.

ઘરઆંગણે જ્યારે લગ્ન લેવાય ત્યારે સૌથી પહેલાં કંકોતરી પર કંકુ છાંટીને ગણપતિનાં વધામણાં થાય. એ સાથે ઘરની સ્ત્રીઓ કેટલાં બધાં સુંદર મજાનાં લગ્નગીતો ગાઈને હરખાય. આપણે ત્યાં કંકોતરીની સૌથી સુંદર વાત એ છે કે લગ્નની કંકોતરી સૌથી પહેલાં આપણે આપણા ઇષ્ટદેવ કે કુળદેવીને લખીએ.

કંકુ છાંટીને લખીયે કંકોતરી રે લોલ એમાં લખીયે રૂડાં કુળદેવી નામ કુળદેવી માત વ્હેલા આવજો રે લોલ