તેજ-તિમિર

મિઝોરમઃ નવી પાર્ટી, નવો ચહેરો, નવા સીએમ

- તરુણ દત્તાણી

નવાસંવત્સરનો પહેલો મહત્ત્વનો રાજકીય પડાવ દેશનાં પાંચ રાજ્યોએ વિધાનસભાની ચૂંટણીનો હતો જે સંપન્ન થયો. જે એક રાજ્યની ચૂંટણીનું પરિણામ એક દિવસ મોડુ આવ્યું એ પૂર્વોત્તરનું રાજ્ય મિઝોરમ ભલે નાનું રાજ્ય હોય, પણ તેની ચર્ચા ગંભીરતાથી કરવી પડે એવું છે. સમગ્ર રીતે પાંચેય રાજ્યોનાં પરિણામો રાષ્ટ્રીય રાજનીતિ અને આગામી ૨૦૨૪ની લોકસભાની ચૂંટણીના સંદર્ભમાં મહત્ત્વના બની રહેવાના છે. તેને વિશેની ચર્ચાઓ સાર્વત્રિક રીતે થઈ રહી છે અને ચાલતી રહેશે. મિઝોરમમાં પણ આ ચૂંટણી દ્વારા સત્તા પરિવર્તન થયું છે અને એક અનોખું સત્તા પરિવર્તન ગણાય તેવું છે. ૨૦૧૮માં સ્થપાયેલા નવા પક્ષ ઝોરમ પિપલ્સ મૂવમેન્ટને સત્તા મળી છે. પક્ષના સ્થાપક નેતા લાલદુહોમા ભૂતપૂર્વ આઇપીએસ અધિકારી છે. આઇપીએસ અધિકારી તરીકે તેઓ તત્કાલીન વડાપ્રધાન ઇન્દિરા ગાંધીના સુરક્ષા ગાર્ડ પણ રહી ચૂક્યા છે. ૧૯૮૪માં આઇપીએસની નોકરી છોડી તેઓએ કોંગ્રેસમાં જોડાઈને રાજકીય કારકિર્દીની શરૂઆત કરી હતી. પહેલી ચૂંટણીમાં તેઓ કોંગ્રેસના ઉમેદવાર તરીકે પરાજિત થયા હતા. ૧૯૮૪માં વિધાનસભાની ચૂંટણી હારી જનાર લાલદુહોમા એ જ વર્ષે યોજાયેલી લોકસભાની ચૂંટણીમાં બિનહરીફ ચૂંટાયા હતા. ૧૯૮૬માં તેમણે કોંગ્રેસ છોડી દીધી.