કિલર્સ ઑફ ધી ફ્લાવર મૂન : કાળું સોનું, કાળાં પાપ

અમેરિકાનાં કપટ કે કૂટનીતિને ‘કિલર્સ ઑફ ધ ફ્લાવર મૂન' જેવી સત્યકથા દ્વારા સમજવાનો ઉદ્યમ કરવા જેવો ખરો. અમેરિકન સરકારે નિયમો અને નિયંત્રણોની ગૂંચો રચીને મૂળ અમેરિકન જાતિ ઓસેજ સમુદાયનો હકનો પૈસો લૂંટવાની નીતિ અપનાવી. ઓસેજ હત્યાકાંડ ક્રૂડ ઓઇલ માટે અમેરિકનોએ કરેલાં કાળાં પાપની કથાનું શરૂઆતનું પ્રકરણ છે.

ધરતીનું પેટ ફાડી નીકળતું, કાળું સોનું કહેવાતું ક્રૂડ ઓઇલ અર્વાચીન યુગમાં અવારનવાર સંઘર્ષો અને યુદ્ધોનું કારણ બન્યું છે. કુદરતી ખનીજ તેલ માટેની ગાંડી ભૂખ અને અમેરિકાને જાણે પહેલેથી જ ગાઢ સંબંધ હોય એવી પ્રતીતિ એક સત્યકથા કરાવે છે. ૧૮૭૦ આસપાસ યુરોપિયન વસાહતીઓ માટે જગ્યા કરવા, મધ્ય અમેરિકાના કેન્સસ પ્રાંતના ફળદ્રુપ મેદાનોમાંથી નેટિવ અમેરિકન કહેવાતી એક મૂળનિવાસી ઓસેજ જાતિને દબાણ કરીને દક્ષિણમાં આરક્ષિત પ્રદેશમાં ખસેડવામાં આવી, જ્યાંની ખડકાળ જમીન મૂલ્યવિહીન માની લેવાયેલી. કિન્તુ કુદરત કૃપાથી ૧૮૯૭માં ત્યાં ક્રૂડ ઓઇલ મળી આવતા આ જમીનના નવા માલિક ઓસેજ લોકો ધનવંત બન્યા. ૧૯૨૩માં ઓસેજ સમુદાયે મેળવેલી કુલ સંપત્તિની કિંમત અત્યારના પ્રમાણે આશરે ચાલીસ કરોડ ડૉલર થાય! ત્યારે માથાદીઠ આવકની દષ્ટિએ એ વિશ્વનો સૌથી ધનવાન સમુદાય ગણાતો. નેટિવ અમેરિકનોને ત્યાં શ્વેત અમેરિકનો નોકર-ચાકર હોય એવું દુર્લભ દશ્ય પણ ઓસેજ ઘરોમાં જોવા મળતું, જે ઘણા શ્વેતોને પચતું નહીં.

ચિક્કાર પૈસો લાલચી, કપટી શત્રુને જન્મ આપે છે. અમેરિકન સરકારે નિયમો અને નિયંત્રણોની જાતભાતની ગૂંચો રચીને ઓસેજ સમુદાયનો હકનો પૈસો લૂંટવાની નીતિ અપનાવી. વધારામાં, ૧૯૧૦-૩૦ના ત્રણ દાયકામાં ભેદી રીતે ઓસેજ જાતિના લોકોની હત્યાઓ થયા કરે છે. આ લાંબી ઘટનાનું કેન્દ્રબિંદુ બને છે મોલી કાયલ. તેના પરિવારની સ્ત્રીઓ, અન્ય ઓસેજ લોકો અને હત્યાઓનું પગેરું મેળવવા મથતા એક વકીલની પણ કતલ થાય છે. શંકાસ્પદ મોત અને હત્યાઓનો આંકડો ચોવીસે પહોંચતા ઓસેજ કાઉન્સિલ અમેરિકન સરકારને હસ્તક્ષેપ કરવાની માગણી કરે છે. કેસ સોંપાય છે બ્યુરો ઑફ ઇન્વેસ્ટિગેશનને, જેનો હેડ છે, ઓગણત્રીસ વર્ષનો જે. એડગર હુવર. મહત્ત્વાકાંક્ષી એડગર માટે આવા કેસ ઉકેલીને પોતાની ક્ષમતા સાબિત કરવી જરૂરી છે. તે બ્યુરો ઑફ ઇન્વેસ્ટિગેશનને વિશાળ અને તાકતવર સંસ્થા બનાવવા ઇચ્છે છે. કેસ ઉકેલાય છે અને ભવિષ્યમાં એ સંસ્થા અમેરિકાની તાકતવર લૉઇન- ફોર્સમૅન્ટ એજન્સી એફ.બી.આઈ. બને છે, જેની સ્થાપનાથી લઈને પાંચેક દાયકા સુધી એને મજબૂત કરવાનું શ્રેય એડગર હુવર મેળવે છે.