કવર સ્ટોરી

શું ચૂંટણી દરમિયાન જ એવું કંઈક કરી શકાય કે જેથી પોતાને માફક આવે એવી સરકારને ફાયદો મળે?

- સ્પર્શ હાર્દિક

જગતભરમાં તલવાર, તીરકામઠાં અને ઢાલ લઈને અશ્વો પર સવાર યૌદ્ધાઓએ અનેક જંગ ખેલ્યા હતા. ત્યાર પછી શસ્ત્રો આધુનિક થયાં. દારૂગોળો, રાયફલ, ટૅન્ક, ફાઇટર જેટ, સમુદ્રી જહાજો, સબમરીન, ઇત્યાદિએ યુદ્ધનું સ્વરૂપ બદલી નાખ્યું. અહીં સુધી તો સૌને સ્પષ્ટ હતું કે સામેના દુશ્મનો કોણ હતા. યુદ્ધનીતિ અથવા યુદ્ધ પરિસ્થિતિની ચાર-પાંચ પેઢીઓ પલટાઈ ચૂકી હોવાનું કહેવાય છે. પાછલી સદીએ શીતયુદ્ધને જન્મ આપ્યો, જેમાં બે પક્ષોની સીધી ટક્કરનું પ્રમાણ ઘટ્યું અને પડછાયામાં સંતાઈને એકબીજાને પરાસ્ત કરવાની યુક્તિઓ અમલમાં આવી અને હવે, ડિજિટલ વિશ્વમાં સાયબર યુદ્ધોનો જન્મ થયા પછી દુશ્મનોના ચહેરાઓ સાવ અસ્પષ્ટ થયા છે. પ્રૉક્સી વૉરના આ જમાનામાં લડાઈઓ સરહદે ઓછી અને ઇન્ટરનેટ પર વધારે આકાર લે છે. એમાં દેખીતી રીતે કોઈને મારી નાખવાનું લક્ષ્ય નથી હોતું, પણ ઇરાદો હોય છે જનમાનસને એ રીતે પ્રભાવિત કરવાનો કે જેતે દેશમાં અસ્થિરતા સર્જાય, ત્યાંના રાજકીય કે સામાજિક માહોલમાં વિક્ષોભ જન્મે અને કોઈ મુદ્દે જનતાનો દૃષ્ટિકોણ પલટાય. વિરોધી દેશની ચૂંટાઈને આવેલી સરકાર સામે પડવા કરતાં, શું ચૂંટણી દરમિયાન જ એવું કંઈક કરી શકાય કે જેથી પોતાને માફક આવે એવી સરકારને ફાયદો મળે? જવાબ છે, હા. આવી દખલગીરીને ‘ઇન્ફ્લુઍન્સ . ઑપરેશન’ નામ અપાયું છે.