આપણા પૂર્વજોએ ભોજનને ઈશ્વર કેમ માન્યું હશે?

વ્યક્તિ જ્યારે ચાર જણા વચ્ચે પોતાનું ટિફિન ખોલે ત્યારે એ ટિફિન એના પરિવારનું પ્રતિનિધિત્વ કરતું હોય છે. ટિફિન એ ત્રણ ચાર ડબ્બાઓમાં સાથે લવાયેલું ઘર છે.

- મિલી મેર

એવું કહેવાય છે કે એક સમયે જ્યારે મહાદેવે કહ્યું કે, ‘ભોજન એ માત્ર એક માયા છે.' ત્યારે માતા પાર્વતી મહાદેવના આ કથનથી રિસાઈને ત્યાંથી જતાં રહે છે. એમના ગયાં પછી લાંબા સમય સુધી દુષ્કાળ પડ્યો. પૃથ્વી પરના બધા જીવો ભૂખથી ટળવળવાં લાગ્યાં. બધા જીવો મહાદેવ પાસે જઈને ફરિયાદ અને પ્રાર્થના કરવા લાગ્યાં. મહાદેવને એમની પ્રાર્થના સાંભળીને પોતાનાથી થયેલી ભૂલ સમજાણી. ત્યાર બાદ તેઓ દેવી પાર્વતીને રીઝવવા અન્નપૂર્ણા સ્તોત્ર ગાઈને એમની સ્તુતિ કરે છે. મહાદેવની સ્તુતિથી ભગવતી પાર્વતી અન્નપૂર્ણા રૂપે પ્રસન્ન થઈને કાશીમાં પ્રગટ થાય છે. મા અન્નપૂર્ણા સૌને પ્રેમથી જમાડે છે. સ્વયં મહાદેવ દેવીની સામે પાત્ર લઈને भिक्षां देहि ' બોલે છે. ત્યારે માતા ખૂબ હેતથી એમના પાત્રને અન્નથી ભરી દે છે. આજે પણ કાશીમાં માતા અન્નપૂર્ણાનું મંદિર દુનિયાનું એક માત્ર એવું મંદિર છે, જ્યાં સૌને જમાડ્યા બાદ માતાજીને સૌથી છેલ્લે થાળ ધરાવવામાં આવે છે. માતા સૌને જમાડીને અંતે જમે છે.