રાજકાજ

ભાજપના નુકસાનની જવાબદારી કોના શિરે?

- ચાણક્ય

લોકસભાની વર્તમાન ચૂંટણીનાં પરિણામો વિશે ચર્ચા અને ચિંતન કરવાનો સમય ભાજપનો છે. ભાજપની આંખ ઉઘાડનારા આ પરિણામો માટે ઉમેદવારની પસંદગીથી માંડીને પ્રચાર ઝુંબેશની વ્યૂહરચના સુધીના તમામ તબક્કે પક્ષના નેતૃત્વ અને મોવડીમંડળની ક્ષતિઓ અને ભૂલો સૌથી વધુ જવાબદાર છે. પક્ષના કાર્યકરોને દોષ દઈ શકાય તેમ નથી. ઉમેદવારોની પસંદગીમાં પક્ષના મોવડીમંડળે સ્થાનિક નેતાઓ-કાર્યકરોના અભિપ્રાયની ઉપેક્ષા કરીને મનમાની કરી હતી. ગમે તે ઉમેદવારને વિજયી બનાવવાની જવાબદારી કાર્યકરો પર નાખી દેવાની રીતરસમ કાયમ માટે ચાલી શકતી નથી. ૨૦૧૪ અને ૨૦૧૯ પછી આ વખતે એવું મોટા પ્રમાણમાં બન્યું. ભાજપના કાર્યકર પાસેથી જ્યારે કોઈ મોટી અપેક્ષા વિના કામ કરવાની આશા રખાતી હોય ત્યારે કાર્યકરોના અભિપ્રાય પ્રત્યે પણ ધ્યાન આપવું જોઈએ.