પ્રભુ પોતાનાં બંધુ અને બહેની સાથે પ્રજા વચ્ચે આવે છે ત્યારે..

આપણા મનુષ્યોના પ્રતિનિધિ એવા અર્જુનનો રથ કૃષ્ણએ સારથિ બનીને હાંક્યો હતો. એ કૃષ્ણ જ્યારે જગન્નાથ બનીને પ્રજા વચ્ચે આવે છે ત્યારે હજારો મનુષ્યો એમના રથને હાથ આપવા અધીરા હોય છે.

- મિલી મેર

‘હરિવંશ’ પુરાણ પ્રમાણે રથયાત્રાની એક કથા છે કે દ્વારિકાની દીકરી, શ્રીકૃષ્ણનાં બહેન સુભદ્રાજી પિયર આવે છે. બહેન સુભદ્રા પોતાના મોટા ભાઈઓ સમક્ષ નગરચર્યા કરવાની ઇચ્છા વ્યક્ત કરે છે, નાની લાડકી બહેનની ઇચ્છાને માન આપીને દ્વારિકાધીશ કૃષ્ણ અને બંધુ બલરામ બહેન સુભદ્રાજી સાથે રથમાં બેસીને નગરચર્યા કરવા નીકળે છે. બસ, ત્યાર બાદથી રથયાત્રાનું પર્વ મનાવવામાં આવે છે.

એક કથા એવી પણ છે કે, પુરીમાં ગુંડીચા મંદિરમાં સ્થિત દેવીશ્રી કૃષ્ણનાં માસી છે, એ દેવી ત્રણેય ભાઈ-બહેનને પોતાના ઘરે આવવા માટે આમંત્રણ આપે છે અને વર્ષે એકવાર ભગવાન શ્રીકૃષ્ણ અને બલરામજી બહેન સુભદ્રાજી સાથે માસીના ઘરે દસ દિવસ રહેવા જાય છે.