ગુજરાતના અણમોલ રત્ન

ગુજરાતનાં નારી રત્નો

‘બહુરત્ના વસુંધરા’ - એ ઉક્તિને સાર્થક કરતી ગુર્જર ધરા માનવ રૂપી રત્નોની ખાણ છે. વિતેલી સદીઓ અને વિતેલા દાયકાઓમાં પોતાની અનોખી પ્રતિભા અને કર્તૃત્વ શક્તિ દ્વારા તમામ ક્ષેત્રે ગુજરાતના સમાજ જીવનને સમૃદ્ધ કરી ગુજરાતની સંસ્કારિતાને માત્ર ભારતમાં જ નહીં તો વિશ્વ પટલ પર દેદીપ્યમાન કરનારાં અણમોલ માનવ રત્નોની માત્ર યાદી કરીએ તો પણ એક મહાગ્રંથ સર્જાય એટલાં અઢળક રત્નો ગુર્જર ધરાએ આપ્યાં છે. વર્તમાનમાં સામાજિક, શૈક્ષણિક, ઔદ્યોગિક વિકાસને કારણે ઉદીયમાન અઢળક ક્ષિતિજો પર તપસ્વીની માફક આસન જમાવી કાર્ય કરી રહેલાં માનવ રત્નોની પૂરી પિછાણ આપણે ધરાવતાં નથી એ સ્વીકારવું રહ્યું. પ્રસિદ્ધિના સુવર્ણકાળ જેવા આ યુગમાં પણ પ્રસિદ્ધિ પરાંગમુખ રહીને કાર્ય કરનારા લોકો પણ ઓછા નથી. એમના સુધી આપણી પહોંચ વિસ્તરી નથી, એ આપણી મર્યાદા ગણવી રહી અને એટલે ગુજરાતનાં અણમોલ રત્નોની યાદી ક્યારેય પરિપૂર્ણ નહીં બને. આવી કોઈ પણ યાદી પર પૂર્ણવિરામ ન મુકાય એ જ હિતાવહ બની રહેશે. કેમ કે જેમ કાળની ગતિને વિરામ નથી તેમ માનવ પ્રવૃત્તિ પણ ક્યારેય વિરામ નહીં પામે અને આ ઉપક્રમ નિત્ય નૂતન માનવ રત્નોના સર્જન પ્રવાહને અવિરત વહેતો રાખશે અને એટલે ગુણરત્નોની ગાથાનો ક્યારેય અંત આવશે નહીં.

સરિતા જોશી