ચંદુભાઈ વિરાણી : બાલાજી વેફર્સ થકી બન્યા બળુકા બિઝનેસમેન

“બીજાને માન આપશો તો તમને માન મળશે, જો સમયને માન આપીશું તો ચોક્કસ સમય તમને માન આપશે.”

જીવનમંત્ર

“બીજાને માન આપશો તો તમને માન મળશે, જો સમયને માન આપીશું તો ચોક્કસ સમય તમને માન આપશે.”

ખેડૂતપુત્રમાંથી એક સફળ બિઝનેસમેન સુધીની સફર કરનારા ચંદુભાઈ વિરાણી ગુજરાતના એક એવા અણમોલ રત્ન છે, જે પોતાના ખાદ્ય ઉત્પાદનની ઉત્તમ ગુણવત્તા અને વાજબી ભાવને લીધે દરેક વર્ગના લોકોમાં જાણીતા બન્યા છે. પોતાની વેફર્સ, નમકીન, સ્નેક્સ તેમજ નૂડલ્સ જેવા નાસ્તા થકી દુનિયામાં આગવું નામ ધરાવતા બાલાજી વેફર્સે આજે દેશનાં ૧૩ જેટલાં રાજ્યોમાં તેમ જ વિદેશના ૨૫ દેશોમાં પોતાનું સ્થાન ઊભું કર્યું છે. બાલાજી વેફર્સ પ્રાઈવેટ લિમિટેડના એમ.ડી. અને ચૅરમેન ચંદુભાઈ વિરાણીએ બિઝનેસના કોઈ પાઠ ભણ્યા વગર તેમની આવડત અને બિઝનેસ પ્રત્યેની સૂઝ સમજને લીધે એક સફળ બિઝનેસમેન તરીકેની નામના મેળવી છે.

શરૂઆત

બાલાજી વેફર્સ પ્રાઈવેટ લિમિટેડના એમ.ડી. અને ચૅરમેન ચંદુભાઈ જામનગર જિલ્લાના કાલાવાડ તાલુકાના નાના એવા ધૂનધોરાજી ગામના ખેડૂતપુત્ર છે. ધોરણ દસ સુધીનો અભ્યાસ કરી પિતાએ આપેલા માત્ર ૨૦,૦૦૦ રૂપિયા લઈ વર્ષ ૧૯૭૪માં તે રાજકોટને પોતાની કર્મભૂમિ બનાવવાની ચાહ સાથે પોતાના બે ભાઈઓ સાથે આવ્યા હતા. શરૂઆતમાં ચંદુભાઈએ રાજકોટની એક માત્ર એસ્ટ્રોન સિનેમાઘરની કેન્ટીનમાં બે વર્ષ નોકરી કરી હતી, ત્યાર બાદ કેન્ટીનનું સંચાલન પણ સંભાળવાનો અનુભવ લીધો. આ સાથે તેમણે એક શાળામાં ૮ વર્ષ સુધી કેન્ટીનનું સંચાલન પણ કર્યું હતું. આમ એક પછી એક તેઓ બિઝનેસના પાઠ શીખતા ગયા. ૧૯૮૧થી લઈ ૧૯૮૪ સુધી ચંદુભાઈ અને તેમના ભાઈઓએ ઘરેથી વેફર્સ બનાવી આસપાસના માર્કેટ સુધી પહોંચાડવાનું કામ શરૂ કર્યું. વેફર્સનો સ્વાદ ગ્રાહકોને પસંદ આવ્યો. આથી માંગ પણ વધતી ગઈ. વેફર્સના નાના વેપારની સામે પહાડ જેવા કેટલાક સંઘર્ષો પણ ઊભા હતા. પરિવારના વડીલોના માર્ગદર્શન અને સારા સંસ્કારોને લીધે ચંદુભાઈ વિરાણી હંમેશાં મક્કમ મનોબળ, અથાગ પરિશ્રમ અને નીતિથી કાર્ય કરતા. તેમની આસપાસ રહેલા દરેકને માન સન્માન આપતા અને ફળની આશા વગર કર્મને જ પોતાનો ધર્મ માની આગળ વધતા. સમય જ્યા તેનું પરિણામ પણ તેમને સારું મળ્યું.

સંઘર્ષ સાથે પ્રગતિની શરૂઆત