હરિયાણા અને જમ્મુ-કાશ્મીરમાં ચૂંટણીનો તખ્તો ગોઠવાય છે

કોંગ્રેસ અને નેશનલ કોન્ફરન્સે કલમ ૩૭૦ ફરી બહાલ કરવાનું વચન આપ્યું છે. એ લોકો પસંદ કરશે? હકીકતમાં એ રાજ્ય સરકારનો વિષય પણ નથી. છતાં આ મુદ્દે મત માગવામાં આવશે

જમ્મુ-કાશ્મીર અને હરિયાણા વિધાનસભાની ચૂંટણી માટે બાજી ગોઠવવામાં બધા રાજકીય પક્ષો વ્યસ્ત બન્યા છે. હરિયાણામાં ભાજપની સરકાર છે, પરંતુ આ ચૂંટણીમાં સત્તા જાળવી રાખવાનું ભાજપ માટે કપરું કામ છે. ભાજપમાં આંતરિક સ્તરે જ મોટા બખેડા છે. તેને કારણે ટિકિટ વિતરણનો મામલો જ અઘરો બની રહ્યો છે. રાજ્યમાં ભાજપને એન્ટિ ઇન્કમ્બન્સીનો એટલે કે શાસનવિરોધી લોકલાગણીનો સામનો પણ કરવો પડે તેમ છે. આ પરિબળને પહોંચી વળવા માટે ભાજપ તેના અનેક ચાલુ ધારાસભ્યો, પ્રધાનોની ટિકિટ કાપવાનો નિર્ધાર કરીને આગળ વધે છે. એ બધાની નારાજી અને અસંતોષને પહોંચી વળવા માટે ભાજપે પ્રધાનોનાં સંતાનોને ટિકિટ આપવાનું વિચાર્યું છે. મતલબ લોકો સામે નવા ચહેરા પ્રસ્તુત કરવાનો પ્રયાસ કરાશે. ચૂંટણીમાં ચહેરા બદલવાની આ વ્યૂહરચના ભાજપે અન્ય રાજ્યોમાં અપનાવી છે અને તે સફળ પણ રહી છે. અલબત્ત, આ વ્યૂહરચના સાથે અન્ય ફેક્ટર પણ ભાજપની ફેવરમાં હોવા જરૂરી છે અને આ બાબતમાં ભાજપના મોવડીઓ સંપૂર્ણ આશ્વસ્ત રહી શકે તેમ નથી.