મોસમ

મેઘરાજાની સૌરાષ્ટ્રમાં ક્યાંક મહેર તો ક્યાંક કહેર

- જિજ્ઞેશ ઠાકર

સાતમ-આઠમના દિવસોમાં સમગ્ર સૌરાષ્ટ્રને વરસાદે તરબોળ કરી દીધું છે. આજી, ન્યારી, ભાદર ડેમ છલોછલ થયા છે. દ્વારકામાં સિઝનમાં બીજીવાર ૨૦ ઇંચ વરસાદ પડ્યો, રાજકોટને બેહાલ કર્યું તો ભાવનગરમાં હજુ પણ અપૂરતો વરસાદ છે. ભાવનગરના બોર તળાવમાં માત્ર બે મહિના ચાલે એટલું જ પાણી છે, શેત્રુંજી ડેમ પણ ભરાયો નથી. ગીર સોમનાથ, જૂનાગઢ, જામનગર પાણી પાણી. સાતમ-આઠમની રજાઓ નિમિત્તે લોકોએ હરવા-ફરવાનું અને યાત્રાઓનું આયોજન કર્યું હતું, પરંતુ જાણે મેઘરાજાએ પોતાનું પણ કંઈક અલગ જ આયોજન કર્યું હોય તેમ સમગ્ર સૌરાષ્ટ્રમાં આ પાંચ દિવસ દરમિયાન ચારેતરફ વરસાદે ક્યાંક મહેર તો ક્યાંક કહેર કરી છે. સૌરાષ્ટ્રના હેડ ક્વાર્ટર રાજકોટમાં તો રીતસર વરસાદની કહેર હોય તેમ ૧૨ કલાકમાં જ ૧૨ ઇંચ વરસાદે રાજકોટીયન્સને પાણી પાણી કરી દીધા છે. જેના કારણે શાળા કૉલેજોમાં રજાઓ પણ જાહેર કરવી પડી છે. એ જ રીતે ભગવાન કૃષ્ણના જન્મદિવસ નિમિત્તે દ્વારકા નગરીને પણ ૨૦ ઇંચ વરસાદથી ભરી દીધી છે. એક જ સિઝનમાં ખંભાળિયામાં આ રીતે બીજો મોટો વરસાદ થતાં લોકોને મુશ્કેલીઓનો પણ સામનો કરવો પડ્યો છે.