આશીર્વાદ જેમ મળેલા અવાજને ઘોંઘાટ બનાવીશું કે નાદ?

'The Noise of Time’માં લેખક જુલિયન બર્ન્સ લખે કે, ‘સમયના ઘોઘાટનો સામનો શેનાથી કરી શકાય? માત્ર આપણા આંતરિક સંગીત વડે.’ પણ આપણા આંતરિક સંગીતને સ્વરબદ્ધ કરવાની શરૂઆત આપણા શ્વાસના અવાજને સાંભળવાથી થાય?

- મિલી મેર

સ્વર સમ્રાજ્ઞી લતા મંગેશકરના કેટલાક શબ્દો વાંચ્યા હતા કે, ‘હું પ્રભુને એવી પ્રાર્થના હંમેશાં કરતી રહી છું કે, જો શક્ય હોય તો મને પુનર્જન્મ ન મળે, પણ હા, મારે જો મોક્ષ અને સંગીત વચ્ચે પસંદગી કરવી જ પડે તો હું સંગીતની પસંદગી કરીશ.' એવું પણ કહેવાયું છે કે, 'संगीत इस दुनिया का एक आखरी बचा हुआ जादू है'. રશિયન સંગીતકાર દામેત્રી શાસત્કોવીચના જીવન પરથી લખાયેલી નોવેલ ‘The Noise of Time'માં લેખક જુલિયન બર્ન્સ લખે કે, ‘સમયના ઘોંઘાટનો સામનો શેનાથી કરી શકાય? માત્ર આપણા આંતરિક સંગીત વડે.' પણ આપણા આંતરિક સંગીતને સ્વરબદ્ધ કરવાની શરૂઆત આપણા શ્વાસના અવાજને સાંભળવાથી થાય?

સૃષ્ટિને સર્જનહારે અવાજની ભેટ આપી છે. આપણે સતત કેટલા બધા અવાજોથી ઘેરાયેલા છીએ? જ્યારે આ ટાઇપ કરું છું ત્યારે ટાઇપિંગનો અવાજ, ચીં..ચીં...ચીં કરીને હવામાં જાણે કશુંક ટાઇપ કરતી હોય એવો ગૅલેરીમાંથી આવતો ચકલીનો અવાજ, લિફ્ટનો અવાજ, રોડ પરના ફેરિયાનો અવાજ, કચરો લેવા આવતી ગાડીમાં વાગતાં ગીતનો અવાજ, ફોનમાં વાગતી રિંગ અને નૉટિફિકૅશનનો અવાજ, ટીવી, પંખાનો અવાજ, કેટકેટલા અવાજો અને એ વચ્ચે આપણે ઓળખવાનું હોય છે આંતરિક સંગીત.