ફેમિલી ઝોન. બ્યુટી.

વેક્સિંગ ટ્રીટમેન્ટ અને સંવેદનશીલ ત્વચા

- હેતલ ભટ્ટ

શરીર માટે પરના અણગમતા અને વણજોઈતા વાળ દૂર કરાવવા મહિલાઓ વેક્સિંગ ટ્રીટમેન્ટ કરાવતી હોય છે. જોકે ઘણી મહિલાઓની ત્વચા સંવેદનશીલ હોય છે. તેથી વેક્સિંગ કરાવ્યા બાદ હાથ-પગ પર લાલાશ પડતા ડાઘા ઊપસવા, ફોલ્લીઓ થવી, ખંજવાળ આવવી વગેરે સમસ્યાઓ સર્જાતી હોય છે. ઘણીવાર ત્વચા વધારે પડતી રુક્ષ થઈ જતી હોય છે. ત્વચા સંવેદનશીલ હોવા ઉપરાંત ક્યારેક જો વેક્સ ક્રીમ પણ અનુકૂળ ન આવે ત્યારે પણ આ બધી તકલીફો થતી હોય છે. વેક્સિંગ ટ્રીટમેન્ટ કરાવ્યા બાદ કેટલીક બાબતોનું ધ્યાન રાખવું જરૂરી બની જાય છે, જેથી ત્વચા સાથે જોડાયેલી સમસ્યાઓ પરેશાન ન કરે.

સૌથી પહેલાં તો અનુકૂળ હોય તેવા વેક્સ ક્રીમનો ઉપયોગ કરવાનો રાખવો. બજારમાં જુદી-જુદી બ્રાન્ડની વેક્સ ક્રીમ મળતી હોય છે, પરંતુ આપણી ત્વચાને અનુકૂળ હોય તેવી ક્રીમનો જ ઉપયોગ કરવો. જો સલૂનમાં વેક્સિંગ ટ્રીટમેન્ટ કરાવતા હો તો કઈ બ્રાન્ડની ક્રીમનો ઉપયોગ કરવામાં આવે છે તેનું ધ્યાન રાખો.