દિલ્હીનો એક રસ્તો હવે ગુજરાતથી પણ નીકળે છે!

વિધાનસભા ચૂંટણીનું પરિણામ નજર સામે છે. હવે સવાલ છે આજ પછીની શક્યતાઓનો. શક્યતા અનેક છે, પણ એટલું નિશ્ચિત છે કે ગુજરાતનાં પરિણામ રાષ્ટ્રીય સ્તરે ભવિષ્યનાં રાજકીય સમીકરણો ઘડવામાં બહુ મહત્ત્વનાં પુરવાર થશે.

- કેતન ત્રિવેદી (અમદાવાદ)

મતદારોનો ફેંસલો જે હોય, હવે પછીનાં થોડાં વર્ષ રાજકીય મોરચે ગુજરાતની ચૂંટણીનો પ્રભાવ જરૂર વર્તાશે.

છેવટે ફેંસલો થઈ ચૂક્યો છે. આ વખતે ભાજપની બેઠકો વધશે કે ઘટશે? કોંગ્રેસનું શું થશે?થી શરૂ થઈને છેલ્લે આમ આદમી પાર્ટી કેટલી બેઠક મેળવશે? જેવા સવાલો સુધી આવીને અટકેલી ગુજરાત વિધાનસભાની આ વખતની ચૂંટણીમાં છેલ્લી ઘડી સુધી મૌન રહેલા મતદારોએ ઈવીએમનું બટન દબાવીને એ વાતે મૌન તોડ્યું છે કે એને હજી ભાજપ પર જ ભરોસો છે કે પછી એ હવે પરિવર્તન ઈચ્છે છે?!

અલબત્ત, ચિત્રલેખાનો આ અંક તમારા હાથમાં આવશે ત્યારે એ વાતનો પણ ફેંસલો થઈ ચૂક્યો હશે. પરિણામ બહાર આવી ગયા પછી ક્યાંક ખુશી તો ક્યાંક ગમનો માહોલ હશે અને આ બધાની વચ્ચે જીતેલા પક્ષ દ્વારા નવી સરકારની રચનાનાં સમીકરણો પણ ગોઠવાઈ રહ્યાં હશે.

મંગળવાર, ૬ ડિસેમ્બરની બપોરે આ લખાઈ રહ્યું છે ત્યારે ગુજરાતમાં બન્ને તબક્કાનાં મતદાન પછી રિવાજ પ્રમાણેના એક્ઝિટ પોલ્સ પણ બહાર આવી ચૂક્યા છે. રાજકીય પક્ષો હજુ ઓછા-વધુ મતદાનનાં સમીકરણો પોતાને કેટલો ફાયદો-નુકસાન કરાવશે એ ગણતરી માંડી રહે એ પહેલાં એક્ઝિટ પોલ્સે ભાજપની સરકાર બનાવી પણ દીધી છે.

મોટા ભાગના વરતારા ભાજપ ગુજરાતમાં સાતમી વખત સરકાર બનાવશે એવું ભાખી રહ્યા છે, પણ આપણે અહીં મતદાનના આંકડા કે એક્ઝિટ પોલ્સના આટાપાટામાં નથી પડવું, કારણ કે આ અંક તમે વાંચતા હશો ત્યાં સુધીમાં પરિણામ ઑલરેડી સ્પષ્ટ થઈ ચૂક્યું હશે.

- એટલે આ વખતે વાત કરવી છે પરિણામો પછીની રાજકીય શક્યતાઓની. આ ચૂંટણીનાં પરિણામો ગુજરાતનાં અને દેશનાં હવે પછીનાં રાજકીય સમીકરણો બદલાવવામાં કેવી ભૂમિકા ભજવી શકે છે તથા ભાજપ કે કોંગ્રેસની હાર-જીતથી રાષ્ટ્રીય કક્ષાએ રાજકીય ચિત્ર કેવી રીતે બદલાઈ શકે છે એ સમજવું પણ એટલું જ મહત્ત્વનું છે. ૨૦૨૪ની લોકસભા ચૂંટણી માટે પણ ગુજરાતનાં પરિણામો સમજવાં જરૂરી છે. સામાન્ય રીતે ચૂંટણીની રમતમાં જો અને તોને સ્થાન નથી. ચૂંટણીના રણમાં તો જે જીતે એ જ શૂર, પણ ભવિષ્યનાં રાજકીય સમીકરણો ઘડવામાં આ જો અને તો બહુ મહત્ત્વના હોય છે.

કેવી કેવી શક્યતા છે?