હાર્ટ-ટુ-હાર્ટ: હસ્તમેળાપ પહેલાં કઈ હદ સુધીનો મેળાપ યોગ્ય?

તાજેતરમાં એક કિસ્સામાં નવવધૂએ જીવનસાથી વધુપડતો બોલ્ડ લાગતાં લગ્નજીવન શરૂ થાય એ પહેલાં જ તોડી નાખ્યાની ઘટના સમાચારમાં ચમકી છે ત્યારે સગાઈ અને લગ્ન વચ્ચેના સમયમાં કેટલી છૂટ લેવી એ મુદ્દો ચર્ચાઈ રહ્યો છે. શું છે આ વિશે એક્સ્પર્ટ ઓપિનિયન?

- કેતન મિસ્ત્રી

મુંબઈના પશ્ચિમી પરાની વૈભવશાળી રેસ્ટોરાંમાં એક જવાન કપલની સામે બે અધિકારી જેવી લાગતી વ્યક્તિ બેઠી છે. કપલ મોકટેલની મજા માણી રહ્યું છે, જ્યારે પેલા અધિકારી ટાઈપ ધીમા સ્વાદે વ્હિસ્કીની ચૂસકી ભરી રહ્યા છે. સૉલ્ટી કાજુ-પાપડ-સૅલડની ડિશ મૂકી વેઈટર રવાના થયા બાદ તરત કપલમાંની કન્યા પેલા બન્નેને કહે છેઃ ‘ગમે તેમ કરીને અમને એક દિવસમાં પાસપોર્ટ લાવી આપો. અમારે સગાંવહાલાંને, મિત્રોને બતાવી આપવું છે કે અમે લગ્ન પહેલાં મોલદીવ્સ ગયેલાં. ચોરીછૂપીથી નહીં, પણ બન્નેના પરિવારની સંમતિથી.’

સાવ સાચા આ કિસ્સાની સામે આ મહિને જ બનેલી સત્ય ઘટના જુઓ. ઉત્તર પ્રદેશના એક નાના નગરમાં કોડીલાં વર-વધૂ સ્ટેજ પર બેઠાં છે. લગ્નસમારંભમાં એક પછી એક મહેમાન આવતા જાય છે. ઠંડાં પીણાં ને સ્ટાર્ટરની મજા માણતાં સૌ નવદંપતીને જોઈ રહ્યા છે. અચાનક વરને શું સૂઝ્યું તે એણે મહેમાનોની સામે, ચકાચોંધ રોશનીમાં કન્યાને કિસ કરી લીધી. એના આ કૃત્યથી ગુસ્સે ભરાયેલી કન્યા ફંક્શન છોડીને હૉલમાં એને આપવામાં આવેલા રૂમમાં જતી રહી. બન્ને પક્ષના પરિવારજનોએ મામલો શાંત પાડવાની ટ્રાય કરી, પણ કન્યા તો પોલીસસ્ટેશને પહોંચી ગઈ. ફરિયાદમાં એણે જણાવ્યું: ‘મારે હવે આની (વરની) સાથે રહેવું નથી. હું મારા ઘરે રહીશ. મને એનો આવો સ્વભાવ ન ગમ્યો. ૩૮ મહેમાનોની સામે આવું કરનારો માણસ કેવો હશે? મને નથી લાગતું કે હવે એ સુધરે. એની સામે કાયદેસર પગલાં લેવાં જોઈએ.’

પોલીસે જ્યારે વરભાઈને પૂછ્યું કે બંધ ઓરડામાં કરવા જેવું કૃત્ય આમ જાહેરમાં શું કામ કર્યું? તો એનો જવાબ હતોઃ ‘ઍક્ચ્યુઅલી અમારી વચ્ચે શરત લાગેલી કે હું મહેમાનોની સામે એને કિસ કરું તો એ હારી જાય અને એણે મને પંદરસો રૂપિયા આપવાના.. ન કરી શકું તો મારે એને ૩૦૦૦ રૂપિયા આપવાના.’

પરંતુ નવવધૂનું કહેવું છે કે એ સાવ ખોટાડો છે. અમારી વચ્ચે આવી કોઈ શરત લાગી જ નહોતી. શરત તો એ છોકરા અને એના દોસ્તો વચ્ચે લાગી હતી અને શરત જીતવા એણે બધાની સામે મને કિસ કરી એમાં મારું સમ્માન ઘવાયું છે. જે છોકરો લગ્નના દિવસે માત્ર એક શરત ખાતર મારો અનાદર કરે, મારું રિસ્પેક્ટ ન રાખે એ આગળ જતાં શું કરશે?