પઠાણ બન્યા તો ઉર્દૂ તો બોલના પડેગા..

ફિલ્મ પ્રોડ્યુસરનો પીછો છોડાવવા કરવું પડ્યું નાટક..

- રાજુ પટેલ

મોતીવાલા હજી તો મહેશ ભટનાગર સામે બેઠા ને એ લોકો વાત શરૂ કરે એ પહેલાં એમની બાજના ટેબલ પરના એક માણસે ઊભા થઈ મોતીવાલાને કહ્યું: ‘અરે મોતીવાલા, તમે? આ શું ફેન્સી ડ્રેસ જેવાં કપડાં પહેરી અહીં બેઠા છો!’

મહેશ ભટનાગર અને મોતીવાલા, બન્ને એ માણસને જોતા રહી ગયા. દવે અને મારી હાલત આ જોઈ કાપો તો લોહી ન નીકળે એવી થઈ ગઈ.

હવે શું થશે?

વાત એમ હતી કે નફીસા નામની એક મુસ્લિમ વિદ્યાર્થિની એક ફિલ્મદિગ્દર્શક મહેશ ભટનાગરને પોતાની આગામી ફિલ્મ માટે એકદમ યોગ્ય ચહેરો લાગતાં એ એની પાછળ પડી ગયો હતો કે નફીસાએ એની ફિલ્મમાં કામ કરવા હા પાડવી. મહારાષ્ટ્રના અંતરિયાળ ગામમાંથી ભણવા મુંબઈ આવેલી નફીસાને ભણવા સિવાય કોઈ ઈતર પ્રવૃત્તિમાં સમય નહોતો બગાડવો અને એના ઘરનું વાતાવરણ પણ જુનવાણી હતું, એ લોકો નફીસાને ફિલ્મમાં તો કામ ન જ કરવા દે ઉપરાંત એનું ભણવાનું છોડાવી રાતોરાત ક્યાંક પરણાવી દે.

આ મહેશ ભટનાગર નફીસાનો કેડો મૂકે અને નફીસા શાંતિથી અભ્યાસ કરી શકે એ માટે અમે એટલે કે મોતીવાલા કન્સલ્ટન્સીએ એક નાટ્યઅભિનેતાને નફીસાના પાકિસ્તાની પિતા તરીકે ઊભો કર્યો અને એ નફીસાના પિતા તરીકે મહેશ ભટનાગરને એની ફિલ્મ માટે ના પાડી દે એટલે વાત પતે એવી અમારી ધારણા હતી. જો કે છેલ્લી ઘડીએ એ અભિનેતા ન આવી શક્યો અને અમે અમારા બૉસ મોતીવાલાને નફીસાના પિતા તરીકે પેલા ફિલ્મદિગ્દર્શકને મળી મારી દીકરી ફિલ્મમાં કામ નહીં કરે એટલું કહેવા તૈયાર કર્યા.

આમ તો કામ માત્ર પાંચ મિનિટનું હતું. જે કાફેમાં મહેશ ભટનાગરને મળવાનું હતું ત્યાં જવા મોતીવાલાને મારા કલીગ દવેએ પઠાણી પહેરવેશમાં તૈયાર કર્યા.

એ કાફેમાં અમારા સ્ટાફના દવે, મોતીવાલાની સાળી પરિણીતી, પ્યુન વિઠ્ઠલ અને હું જુદા જુદા ખૂણે ગ્રાહક બની ગોઠવાઈ ગયાં હતાં, જેથી મોતીવાલાને બધાં મારી સાથે છે. એવો સધિયારો રહે.

પણ મોતીવાલાના કોઈ ઓળખીતાએ મોતીવાલાને પઠાણી વેશમાં જોઈ ભાંગરો વાટ્યો. માંડ માંડ જીવંત અભિનય કરવા તૈયાર થયેલા અને અભિનયના તદ્દન બિનઅનુભવી મોતીવાલા આ ઓચિંતા હુમલાથી ડઘાઈ ગયા. દવેએ જો કે બાજી સંભાળી લીધી. મોતીવાલાને ઓળખી જનારા માણસ પાસે જઈ દવેએ કહ્યું: ‘વાસવાની સર! અચ્છા હુઆ આપ યહાં મિલ ગયે.’