કંચનવર્ણી કાયાને નિખાર આપતાં આભૂષણની ઝગમગ સૃષ્ટિ..

સમય ગમે એટલો બદલાય, મંડપથી મધુરજનીમાં ગમે એટલાં પરિવર્તન આવે કે પછી વધુ ગમે એટલી મૉડર્ન હોય, લગ્નપ્રસંગે આભૂષણો પ્રત્યેનું આકર્ષણ અકબંધ રહ્યું છે ને રહેશે.

- દેવેન્દ્ર જાની (રાજકોટ) । અરવિંદ ગોંડલિયા (સુરત)

ઘરમાં લગન લેવાય એટલે પહેલો સવાલ આવેઃ દાગીનાનું કેમનું છે? 

હા, લગ્નપ્રસંગમાં ભારતીય નારીની પહેલી પસંદ કહો કે પહેલી ખરીદી સોનાનાં આભૂષણોની રહી છે. આનાં મુખ્ય બે કારણ છે. એક તો બે સોનાને એક ઈન્વેસ્ટમેન્ટ તરીકે જોવામાં આવે છે અને બીજું, સોનાના દાગીનાથી સ્ત્રીનું સૌંદર્ય નીખરી ઊઠે છે. નવવધૂ કે એના પરિવારજનો ચાહે અમીર ઘરાણાનાં હોય કે મધ્યમવર્ગી, દરેક પોતાની શક્તિ મુજબ સોના-ચાંદીનાં આભૂષણોની ખરીદી કરે જ છે. કેટલીક મહિલા પોતાના મર્યાદિત બજેટમાં રિચ લુક આપતી જ્વેલરીની પસંદગી કરે છે તો કેટલીક સ્ત્રી સિમ્પલ-સોબર ડિઝાઈન પસંદ કરે. ચૉઈસ જે હોય તે, પણ જ્વેલરી તો જોઈએ જ.

મયૂરભાઈ સોની: લાઈટ વેઈટ, ડેલિકેટ અને રોઝ ગોલ્ડની ૧૮ કૅરેટની જ્વેલરીની જાળવણીમાં સુગમતા રહે છે એટલે એ ઈનથિંગ બની છે.

ભારતની જ્વેલરી માર્કેટમાં સતત અવનવા ટ્રેન્ડ જોવા મળતા હોય છે. દુનિયામાં ભારત સોનાના વપરાશમાં બીજા નંબરે છે અને સોનાની ખરીદીમાં લગ્નપ્રસંગ વેળાએ થતી ખરીદીનો હિસ્સો મોટો છે. ભારત એની જરૂરતનું ૯૦ ટકા જેટલું સોનું આયાત કરે છે અને જે સોનું આવે છે એમાં પણ ૭૦થી ૮૦ ટકા આભૂષણો માટે વાપરવામાં આવે છે. વર્લ્ડ ગોલ્ડ કાઉન્સિલના તાજા અહેવાલ મુજબ ૨૦૨૨માં દુનિયામાં ૨૦૮૬ ટનની ગોલ્ડ જ્વેલરીની ડિમાન્ડ હતી, એમાં ભારતનો હિસ્સો ૬૦૦ ટનની જ્વેલરીનો રહ્યો હતો. ૨૦૨૨માં ભારતમાં બચત માટે માત્ર ૧૭૩ ટન સોનું ખરીદવામાં આવ્યું હતું. આપણી પરંપરા મુજબ લગ્નપ્રસંગે સૌથી વધુ સોનાની જ્વેલરીની ખરીદી કરવામાં આવે છે. સોનાના ભાવ ઊંચા ગયા છતાં આ પરંપરા અકબંધ રહી છે.