યે તો મહેંદી હૈ, મહેંદી તો રંગ લાતી હૈ..

મેંદીની વાત આવે ત્યારે આજની નવીનવેલી દુલ્હનની પસંદ-નાપસંદની એ એક નવી ભાત ઉપસાવે છે.

- અરવિંદ ગોંડલિયા (સુરત)

મેંદી એ માત્ર કળા નથી, પણ ભારતીય સંસ્કૃતિ છે. મેંદીના રંગ સામે લગ્નના બધા રંગ ફિક્કા. દુલ્હનના હાથમાં મેંદી વિના ભારતીય લગ્ન અધૂરાં, અશક્ય. બીજા શબ્દોમાં કહીએ તો મેંદીના રંગ વિના લગ્નપ્રસંગમાં રંગ જામતો નથી. હાથોની મેંદીમાં પણ અવનવો ટ્રેન્ડ જોવા મળે છે. એક સમયે માત્ર ઘરેલુ ગણાતી મેંદી હવે વ્યાવસાયિક રીતે પણ ખૂબ રંગ લાવી રહી છે.

નર્મદનગરી સુરતની વાત કરીએ તો મેંદીનું નામ આવે એટલે સાથે નિમિષા પારેખનું નામ પણ આવી જ જાય. સાવ કાચી વયથી એમને મેંદી સાથે મહોબ્બત હતી. એટલું જ નહીં, બાળપણમાં એમણે મેંદીકળાને વ્યાવસાયિક રીતે અપનાવી હતી. મેંદી અને મેંદી મૂકનાર બન્નેને માન મળવું જોઈએ એવી એમની બાળપણથી વિચારધારા રહી છે.

મેદીવાળીને બોલાવો એવું કોઈ કહે તો એમને ગમતું નહીં. મેંદીવાળીનું લેબલ હટાવવા એ પ્રોફેશનલ ભારતીય પરિવેશમાં જ મેંદી મૂકવા જાય છે. આને લીધે એમની અલગ ઓળખ ઊભી થઈ. નવાઈ લાગે, પણ નિમિષાએ અમેરિકાથી મેંદી મૂકવાની કળાનો ખાસ સર્ટિફિકેટ કોર્સ કર્યો છે. સુરતમાં જ નહીં, પણ સંભવિત દેશમાં મેંદીનો સ્ટુડિયો બનાવનાર નિમિષા પારેખ પ્રથમ મેંદી આર્ટિસ્ટ છે. એમનાં સહાયક હિમાદ્રી સિંહા અને સરિતા સિંહાનાં સૂચન અને સહયોગથી મેંદી ક્ષેત્રે પ્રથમ વખત આવું સાહસ ખેડ્યું.

નિમિષાએ ૨૦૦૮-૨૦૦૯માં સુરતમાં સાક્ષી મહેંદી સ્ટુડિયો ચાલુ કર્યો. સાક્ષી નામ પાછળનું એમનું ગણિત એવું કે બે પરિવાર વચ્ચે થઈ રહેલા નવા જોડાણની આ મેંદી સાક્ષી બની રહેશે! નવી નવી ડિઝાઈન અને ઈનોવેશન સાથે નિમિષાની મેંદીયાત્રા આગળ ચાલતી રહી. એમની મેંદીની ખુશ્બ ભારતીય સીમાડાને પાર કરીને છેક અમેરિકા અને બ્રિટન સુધી પહોંચી.