વર-વધૂની વસ્ત્રસજ્જાઃ એક સે હમારા ક્યા હોગા?

લગ્ન જેવા મહાન ગણાતા અવસરમાં વર-કન્યા રંગેચંગે પરણી જાય એનું જેટલું મહત્ત્વ હોય છે એટલી જ મહત્ત્વની હોય છે એકમેકનાં પૂરક બનતી એમની વસ્ત્રસજ્જા, એની રંગછટા અને સ્ટાઈલ.. હવે લગ્નવિધિ માટેની એક જોડી બસ નથી. વેડિંગની આસપાસ ઊજવાતા વિવિધ ઈવેન્ટ માટે વૈવિધ્યસભર પોશાક ખપે છે.

- મહેશ શાહ (અમદાવાદ)

મુંબઈ-ગુજરાતમાં નવરાત્રિ, દિવાળીના તહેવારો તથા લગ્નની સીઝનમાં ખાસ કરીને વસ્ત્રો અને જ્વેલરી શો-રૂમમાં ભારે ઘરાકી જોવા મળે. છેલ્લાં થોડાં વર્ષથી લગ્ન પહેલાં મેંદી, હલદી (પીઠી), સંગીતસંધ્યા, રિંગ સેરેમની જેવા જાતજાતના પ્રિ-વેડિંગ ઈવેન્ટ યોજાય છે. એ દરેક પ્રસંગ માટે જુદા જુદા રંગ અને થીમનાં વસ્ત્રો પહેરવાનો ચાલ છે. આ ઉપરાંત, ટીવી અને ફિલ્મના કલાકારો, મોડેલ, સેલિબ્રિટીનાં ડિઝાઈનર વસ્ત્રોથી પ્રભાવિત થઈને અથવા તો સોશિયલ મિડિયાના ટ્રેન્ડને અનુસરીને કન્યા અને વરરાજા તથા તેમના અમુક પરિવારો ખાસ કરીને લગ્નપ્રસંગ માટે વસ્ત્રો ખરીદે છે. આવા વખતે કયા પ્રસંગમાં શું પહેરવું એ એક મૂંઝવણ બની જતી હોય છે.

સાડી અને લેડીઝવેરની ખરીદી માટે અમદાવાદના જાણીતા સ્થળ આસોપાલવના યુવા સંચાલક વિકાસ ભણશાળી કહે છે કે ઘણા પરિવારો પ્રિ-વેડિંગમાં સંગીતસંધ્યાના ઈવેન્ટને ખૂબ મહત્ત્વ આપે છે એટલે લગ્ન, રિસેપ્શનની જેમ સંગીતસંધ્યા ફંક્શનનાં વસ્ત્રો માટે પણ વિશેષ કાળજી લે છે.

૪૮ વર્ષથી ગૃહિણીઓ અને લગ્નોત્સુક કન્યાઓનો માનીતો શો-રૂમ આસોપાલવ એટલે લેટેસ્ટ ડિઝાઈનનાં અવનવાં વસ્ત્રો તથા કન્યા માટે વેડિંગ કલેક્શનનું વન-સ્ટૉપ શૉપિંગ ડેસ્ટિનેશન. અમદાવાદમાં ચાર અને સુરતમાં એક સ્ટોર ધરાવતા આસોપાલવના વિકાસભાઈ ઉમેરે છે કે લગ્નની સીઝનના ત્રણેક મહિના અગાઉથી અમારી તૈયારી શરૂ થઈ જાય.

લેટેસ્ટ ટ્રેન્ડ વિશે એ કહે છે કે હજી હમણાં સુધી વ્હાઈટ, રેડ અને પિન્ક કલરની બોલબાલા હતી. આજકાલ ડિમાન્ડ છે સિલ્ક કાપડમાં યલો ગોલ્ડ કલરની. હલદી, મેંદી ફંક્શનમાં કન્યા વ્હાઈટ કે પેસ્ટલ કલરના ફ્લોરલ એમ્બ્રોઈડરીવાળાં વસ્ત્રો પહેરે તો શોભી ઊઠે, જ્યારે કન્યાની માતા, બહેન, ભાભી, વગેરે મહિલાઓ યલો કલરનાં વસ્ત્રો પહેરી શકે. અમુકને કૅપ સ્ટાઈલનાં લૂઝ જૅકેટ પહેરવાં ગમે.

ટક્સિડો સૂટ હોય કે પારંપરિક શેરવાની કે પછી ચૂડીદાર-કુરતા.. માપ મુજબ પરફેક્ટ ફિટિંગનાં કપડાં ટ્રાય કરીને લેવાં હિતાવહ છે, જેથી છેલ્લી ઘડીએ વસ્ત્રનાં વિઘ્ન ન આવે.