રશ્મિ ઝા: જિંદગીના પડકારને સહર્ષ ઝીલનારી ચેલેન્જ ગર્લ

નવી ભાષા શીખવાથી માંડી ડગલે ને પગલે એની કસોટી થઈ, પણ એક પછી એક અંતરાય પાર કરીને એ આગળ વધતી ગઈ. આજે એણે અનેક ક્ષેત્રમાં કાઠું કાઢ્યું છે. એ ભાગવતકથા કરે છે અને એટલી જ સહજતાથી કાઉન્સેલર તરીકે બાળકોની સમસ્યા પણ ઉકેલે છે.

- અરવિંદ ગોંડલિયા

એ શિક્ષક છે, એ કાઉન્સેલર છે, એ એકેડેમિક ઍડ્વાઈઝર છે, એ મેમરી ટ્રેનર છે, એ લેખિકા છે અને સારી વક્તા પણ છે. એ ભાગવતપુરાણ તથા શ્રીમદ્ ભગવદ્ગીતા પર કથા પણ કરે છે અને યોગ, રંગોળી, મેંદી જેવી કળામાં પણ નિપુણ છે. એને ચૅલેન્જ ઉપાડવી ખૂબ ગમે છે, કારણ કે એ અંધારાને પ્રકાશમાં ફેરવી નાખે એવું કિરણ છે. એ છે રશ્મિ ઝા.

બિહારના સીતામઢીમાં જન્મેલી રશ્મિ હિતનાથ ઝા મૂળ હિંદીભાષી અને એનું પ્રારંભિક શિક્ષણ અંગ્રેજી માધ્યમમાં. તેમ છતાં ગુજરાતી ભાષામાં એનું વક્તવ્ય લોકોને આકર્ષિત કરે છે. સીતામઢીમાં કૉન્વેન્ટ સ્કૂલમાં અંગ્રેજી માધ્યમમાં નર્સરીથી એના શિક્ષણની શરૂઆત થઈ. ધોરણ એક પછી સારા માર્કને કારણે ધોરણ બીજું સ્કિપ કરીને એણે ત્રીજા ધોરણમાં પ્રવેશ લીધો અને એ જ રીતે ચોથું ધોરણ પણ સ્કિપ કર્યું. ધોરણ પાંચથી હિંદી માધ્યમ શરૂ થયું અને એ છઠ્ઠા ધોરણમાં હતી ત્યારે એનો પરિવાર ગુજરાતના સુરતમાં સ્થાયી થયો. અહીં હિંદી માધ્યમની સ્કૂલમાં જ એક વિષય તરીકે ગુજરાતી શીખવાનું આવ્યું તો સાતમા ધોરણમાં તો અભ્યાસ જ ગુજરાતી માધ્યમમાં શરૂ થયો.

ત્યાં સુધી એને ગુજરાતી બોલતાં-લખતાં બરાબર આવડતું નહોતું, એને કારણે સાતમું ધોરણ આખું તો ક્લાસમાં એ મૌન જ રહેતી. આઠમા ધોરણમાં થોડી વાચા ફૂટી. જો કે એ દરમિયાન એક શિક્ષકે મહેણું માર્યું કે આને કોઈ દિવસ ગુજરાતી નહીં આવડે અને ગુજરાતીમાં પઠન તો એ કરી જ નહીં શકે.