શું મહત્ત્વનું? સેલ્ફી કે સેલ્ફ રિસ્પેક્ટ?

માનીતા સ્ટાર્સ, ક્રિકેટર કે જાણીતી વ્યક્તિ સાથે સેલ્ફી લેવાનું કે એમની સાથે ફોટો પડાવવાનું ગાંડપણ ક્યાં જઈને અટકશે?

- કેતન મિસ્ત્રી (મુંબઈ)

ગયા વર્ષના મે મહિનાની વાત. કોલકાતાના હુગલીમાં સ્ટેજ શો માટે ગયેલા સિંગર કેકેની તબિયત બગડતાં એને હૉલની બહાર લઈ જવામાં આવ્યો. એ સમયનો વિડિયો વાઈરલ થયેલો, જેમાં દેખાય છે કે બેચેન–બીમાર કેકે બહાર આવી રહ્યો છે ત્યારે એને મદદ કરવાને બદલે અમુક જણ વિડિયો ઉતારી રહ્યા છે તો અમુક એવી હાલતમાં એની સાથે ફોટા–સેલ્ફી લેવાની કોશિશ કરી રહ્યા છે. કમનસીબે હોટેલ પર પહોંચતાંવેંત કેકેની તબિયત વધારે બગડી ને થોડી વારમાં એનું અવસાન થયું.

ગયા મહિને (૧૫ ફેબ્રુઆરીએ) ૨૩ વર્ષી ક્રિકેટર પૃથ્વી શૉનો કિસ્સો ખૂબ ગાજ્યો. બન્યું એવું કે પૃથ્વી મુંબઈની એક ફાઈવ સ્ટાર હોટેલમાં મિત્ર સાથે ડિનર માટે ગયો ત્યારે સાવ અજાણ્યા લોકોએ એની સાથે સેલ્ફી લેવાનો આગ્રહ કર્યો. આ સેલ્ફીવાંછુઓમાં ઈન્ટરનેટ પર કહેવાતી પ્રખ્યાત ભોજપુરી ફિલ્મઅભિનેત્રી સપના ગિલ પણ હતી. પૃથ્વીએ બેએક જણને સેલ્ફી આપી. થોડો સમય બાદ એ લોકો પાછાં આવ્યાં અને ફરી સેલ્ફી લેવા માટે કહેવા લાગ્યાં. પૃથ્વીએ ના પાડતાં કહ્યું કે મને શાંતિથી જમવા દો. પછી તો સેલ્ફીપુરાણ એ હદે વધી ગયું કે મારામારી થઈ, પૃથ્વીના મિત્રની કારના કાચ બેઝબૉલ બૅટથી તોડી નાખવામાં આવ્યા, પોલીસકેસ થયો, સપના સહિત આઠેક સેલ્ફીપ્રેમીઓની અરેસ્ટ થઈ. છેવટે મેજિસ્ટ્રેટે સૌને જામીન આપ્યા. ના, વાત અહીં પૂરી થતી નથી. જામીન મળ્યા પછી સપના ગિલે તરત પૃથ્વી શૉ પર પોતાની છેડતીનો સામો કેસ નોંધાવ્યો.

આ ઘટનાના એકાદ અઠવાડિયામાં જ મુંબઈમાં પ્લેબૅક સિંગર સોનુ નિગમને ધક્કે ચડાવવામાં આવ્યો. કારણ એ જ સેલ્ફી લેવાનું ઝનૂન. ધક્કામુક્કીમાં સોનુનો મિત્ર સાતેક ફૂટ ઊંચા સ્ટેજ પરથી જમીન પર પટકાયો ને એને હૉસ્પિટલમાં ઍડ્મિટ કરવામાં આવ્યો. આ કેસમાં અમુક લોકોની ધરપકડ થઈ છે.. પખવાડિયા પહેલાં વળી કર્ણાટકનાં એક વરિષ્ઠ આઈપીએસ (ઈન્ડિયન પોલીસ સર્વિસ) અધિકારી ડી. રૂપાએ અન્ય આઈએએસ અધિકારી રોહિણી સિંધુરીના પ્રાઈવેટ ફોટોગ્રાફ્સ ફેસબુક પર પોસ્ટ કરતાં હો-હા મચી ગઈ હતી. સામસામી આક્ષેપબાજી થતાં કર્ણાટક સરકારે બન્નેની બદલી કરી નાખી અને ચેતવણી આપી કે ખબરદાર, જો સોશિયલ મિડિયા પર કંઈ પણ એલફેલ લખ્યું કે ફોટા મૂક્યા છે તો..