વૈશ્વિક સ્તરે ચિંતાનાં કાળાં વાદળ વચ્ચે ભારત છે રૂપેરી કોર

ભારત અત્યારે બીજા દેશોની તુલનાએ બહેતર આર્થિક સ્થિતિમાં હોવા છતાં ગ્લોબલ મંદી કે વિકાસની ધીમી ગતિની અસરમાંથી એ મુક્ત રહી શકે એમ નથી. ધીમે ધીમે આર્થિક ગાડી પાટે ચડે એવી આશા હોય તો પણ અનિશ્ચિતતાની તલવાર થોડો સમય માથે લટકતી રહેશે જ.

- જયેશ ચિતલિયા

દુનિયાભરમાં લોકોને અત્યારે સૌથી વધુ ચિંતા શેની છે? આ સવાલના જવાબ તો જુદા જુદા જ મળવાના. જો કે આ બધામાં એક કૉમન જવાબ એ હોય કે લોકોને સૌથી વધુ ચિંતા વૈશ્વિક મંદીની છે, મોંઘવારીની છે, અનિશ્ચિતતાની છે. આપણે આપણા દેશની વાત કરીએ તો આપણું અર્થતંત્ર હાલ ભલે સૌથી ઝડપી વિકસતું (ફાસ્ટેસ્ટ ઈકોનોમી) ગણાય, પણ ગ્લોબલ મંદીનાં વિચારોથી, ચિંતાથી અને સંભવિત અસરોથી એ મુક્ત રહી શકે એમ નથી. હા, કઈ અને કેટલી અસર થાય એ જુદી વાત બને છે. આ બાબત દેશને, ઉદ્યોગોને અને વિવિધ વ્યક્તિને પણ લાગુ પડી શકે છે. તાજેતરમાં જી-૨ની મીટિંગમાં પણ આર્થિક મંદી કે મુશ્કેલીઓનો વિષય કેન્દ્રમાં રહ્યો છે.

જરૂર પરસ્પર સહકારની

પ્રથમ વાર જી-૨૦નું અધ્યક્ષપદ સંભાળી રહેલા ભારત વતી વડા પ્રધાન નરેન્દ્ર મોદીએ એમના વક્તવ્યમાં સ્પષ્ટ કહ્યું છે કે વિશ્વને સ્થિરતા, વિશ્વાસ અને વિકાસના પથ પર લાવવા સહિયારા પ્રયાસની આવશ્યકતા છે. દુનિયા અત્યારે કેટલાક દેશો વચ્ચેનાં ઘર્ષણ, એને કારણે સપ્લાય ચેનમાં ઊભા થયેલા અવરોધ, વધતા ભાવ-ફુગાવો અને અમુક રાષ્ટ્રોમાં વધી રહેલા કરજના ઊંચા ભાર સહિતની સમસ્યાનો સામનો કરી રહી છે.