નોંધમાં નહીં, હાંસિયામાં..

શાંત જળમાં હોડી આપોઆપ સરતી જાય એમ રાબેતા મુજબ જિંદગી સરતી રહેવાની. આ બધા પડાવો-મુકામો દરેકની જિંદગીમાં વ્યક્તિગત રીતે મહત્ત્વના ખરા, પણ એ કૉપી-પેસ્ટ જેવા લાગે

- હિતેન આનંદપરા

તુજ આત્મકથામાં થયો ઉલ્લેખ ન મારો

એક પાનું જો કે સાવ તેમાં કોરું રખાયું

ઈતિહાસ લખાયો તે ઘડી નામ કોઈનું

સગવડતાભરી રીતે ‘રઈશ’ ભૂલી જવાયુ.

                                     – રઈશ મનીઆર

કેટલાકનાં નામ વિશે લેખ થઈ શકે. કેટલાકનાં નામ ઉલ્લેખમાં પણ સ્થાન પામવા સક્ષમ નથી બનતાં. આખી જિંદગી વિતાવ્યા પછી ફળશ્રુતિની સમરી કરવામાં આવે તો બે વિરોધાભાસી ખયાલ આવે. એક, મેં આટલું બધું કર્યું તોય ખબર ન પડી. બે, મેં જિંદગીમાં કાંઈ કર્યું જ નહીં!

ભણ્યા-ગણ્યા, નોકરી કરી, ધંધો કર્યો, સંસાર માંડ્યો, સંતાન થયાં.. આ બધી ઉપલબ્ધિ ન ગણાય.