નોમિનેશન કરાવી લેવામાં જ છે સમજદારી

જીવનમાં કોઈ બાબત એકદમ નિશ્ચિત હોય તો એ છે મૃત્યુ. જો કે આપણે અહીં જીવન-મૃત્યુની ફિલસૂફીની ચર્ચા કરવી નથી, પણ વ્યાવહારિક બાબતોમાં વ્યક્તિના મૃત્યુ બાદ પરિવારજનોએ એ વ્યક્તિની મિલકતના હક બાબતે હેરાન થવું પડે નહીં એ માટે મ્યુચ્યુઅલ ફંડ સહિત દરેક ઈન્વેસ્ટમેન્ટમાં નોમિનીનું મહત્ત્વ સમજવું જરૂરી છે. તમે જ પસંદ કરી લો તમારો હક કોને મળે એનું નામ.

- જયેશ ચિતલિયા

તમે જ પસંદ કરી લો તમારો હક કોને મળે એનું નામ.

નોમિનેશન શબ્દ આમ તો અવારનવાર આપણે કાને પડે છે. એમાંય હમણાં છેલ્લા કેટલાક દિવસોમાં તો આ શબ્દ આપણે બધાએ અનેક વાર સાંભળ્યો હશે. નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ મ્યુચ્યુઅલ ફંડ્સને એના ધારકો પાસેથી નોમિનીનાં નામ ફરજિયાત નોંધાવવાનું કહ્યું છે. આ માટે ૩૧ માર્ચ, ૨૦૨૩ સુધીની મુદત નક્કી થઈ હતી. હવે ડિમેટ અને ટ્રેડિંગ એકાઉન્ટમાં નોમિનેશન માટેની મુદત ૩૦ સપ્ટેમ્બર સુધી લંબાવવામાં આવી છે.

મુદત જે હોય એ, નોમિનેશન કરાવવું અનિવાર્ય છે, અન્યથા તમારા એકાઉન્ટમાં યુનિટ્સ જમા થઈ શકશે, બહાર જઈ શકશે નહીં અર્થાત્ તમે એ વેચી શકશો નહીં. જો કે જેમણે પહેલેથી નોમિનેશન કરાવી રાખ્યું છે એમને કોઈ સમસ્યા નથી. યાદ રહે, રોકાણકાર ચાહે ત્યારે એના નોમિનીમાં ફેરફાર પણ કરાવી શકે છે.