જીવ્યા કરતાં (ભારતવર્ષ) જોયું ભલું.. ડિમ્પલ-હેમંત મહેતા મુંબઈ

એક પછી એક ટુર કરતાં ગયાં એમ અમે અપડેટ થતાં ગયાં. ભોજન ઠંડું કરીને પૅક કરવા વૅક્યૂમ મશીન વસાવી લીધું

કશ્મીરથી કન્યાકુમારી સુધી ઘૂમી વળેલાં આ મહેતાદંપતી એવાં ફરંદાં છે કે ઈચ્છા થાય ત્યારે પત્ની, સંતાન, સ્નેહીજનો સાથે ઈનોવાની છત પર આશરે ૪૦૦-૫૦૦ કિલોનો સામાન ખડકીને નીકળી પડે છે. છેલ્લા બે દાયકામાં એકાદ અપવાદને બાદ કરતાં એ ક્યારેય ટ્રેન-પ્લેનમાં ફરવા ગયાં નથી, માત્ર રોડ ટ્રાવેલ જ કરે છે.

પોતાનો વ્યવસાય ધરાવતા મધ્યવયસ્ક હેમંતભાઈ કહે છે: ‘૨૪માં મેં ઈનોવા એટલા માટે લીધી કે બહેન, બનેવી, મિત્રો સાથે ફરવા જઈ શકાય. અત્યાર સુધીમાં અમે બે લાખ કિલોમીટરથી વધુનો પ્રવાસ કર્યો છે. દિવસનું ૬૦૦-૭૦૦ કિલોમીટર ડ્રાઈવ કરવાનું અને એક પ્રવાસમાં બે-ત્રણ કે ક્યારેક આઠ-દસ હજાર કિલોમીટરનું ડ્રાઈવ થઈ જાય. આ એસયુવીને મેં મારા સ્વજનની જેમ સાચવી છે. એને ક્યારેય મારાથી અળગી કરી નથી, કરીશ નહીં. એ ઉમેરે છે કે મને ડ્રાઈવિંગનો બેહદ શોખ છે. મુંબઈમાં આપણને ડ્રાઈવિંગ હાડમારી લાગે, કારણ કે ટ્રાફિક અને ખરાબ રસ્તા, પણ એક વાર તમે મુંબઈની બહાર નીકળો, હાઈ-વે ટચ કરો એટલે ઈટ્સ લાઈક અ જૉયરાઈડ. ઈન્ટરસ્ટેટ ટ્રાવેલ એટલે કે બે રાજ્યને જોડતા હાઈ-વે, એક્સપ્રેસ-વે એવા બનાવ્યા છે કે સુપર્બ. હજી તો આવનારા દિવસોમાં વિવિધ એક્સપ્રેસ-વે શરૂ થશે તે પછી રોડ ટ્રાવેલ આશીર્વાદરૂપ બની જશે.’

હેમંતભાઈનાં પત્ની ડિમ્પલબહેનને પણ રોડ ટ્રાવેલનો બેહદ શોખ છે. એ કહે છેઃ ‘એક પછી એક ટુર કરતાં ગયાં એમ અમે અપડેટ થતાં ગયાં. ભોજન ઠંડું કરીને પૅક કરવા વૅક્યૂમ મશીન વસાવી લીધું. ચા-કૉફીથી લઈને થેપલાં, ઢોકળાં, પાંઉ-ભાજી, સૅન્ડવિચ, તીખી-ગળી ચટણી, ભેળ, વગેરે સાથે હોય. પોર્ટેબલ ગૅસ, નાનું લોયું પણ હોય. લહેરાતા ખેતરમાં વૃક્ષ તળે વિરામ લઈએ. ત્યાં ભોજન ગરમ કરી લઈએ. લાંબા રોડ ટ્રાવેલમાં પહેલાં બે-ત્રણ દિવસ ઘરનું જ ખાવું એવો નિયમ રાખ્યો છે. એ ઉમેરે છે કે લાંબી રોડ ટ્રિપમાં અમને લેડીઝને બાથરૂમનો બહુ પ્રોબ્લેમ થતો એટલે ટોઈલેટ ટેન્ટ વસાવી લીધો. પ્રાઈવસી ઉપરાંત ચોખ્ખાઈ! આસપાસ લાખ માણસ ઊભું હોય ને અંદર કપડાં બદલો તોય પ્રોબ્લેમ નહીં.’