જોખમ જિમમાં જવાનું..

કસરત કરવાને બદલે ઈર્ષ્યાથી બળીને જ વજન ઘટી જતું હોત તો?

- સુષમા શેઠ

ગીતાબહેનને ટેન્શન.. ટેન્શન થઈ ગયું. ગીતાને કાંઈ કરતાં કાંઈ ને કે’વાનું એવું શાંતિલાલભાઈનું નમ્ર સૂચન હોવા છતાંય મુકેશભાઈથી કહેવાઈ ગયું: ‘ગીતા, હવે તો તું ડ્રેસિંગ ટેબલના આવડા મોટા અરીસામાંય નથી સમાતી. કાં'ક કર, નહીં તો ઘરનાં બધાં બારણાં મોટાં કરાવવાં પડશે.’

‘લ્યો બોલો, મને આવું સીધેસીધું સંભળાવતાં શરમાતા નથી અને મંજુડી દેખાય ત્યાં તો લળી લળીને વાતો કરતાં આંખો આડી થઈ જાય છે.' હોરિઝોન્ટલ દિશામાં ફેલાતાં ગીતાબહેનને મુકેશભાઈનું વર્ટિકલ વિધાન સાંભળી વાંકું તો પડ્યું, પણ પછી ચિંતામાં ને ચિંતામાં રાતની નીંદર વેરણ થઈ ગઈ.

બીજા દિવસે ગીતાબહેનને એમની બહેનપણી વિભા શાક બજારમાં મળી ગઈ.

‘શું વાત છે વિભુડી, તેં તો બહુ વજન ઘટાડી દીધું ને કાંઈ.’ વિભાને જોઈ ગીતાબહેન આભા થઈ ગયાં. પાકેલી દૂધી જેવી હતી એ વિભાને કૂણી કાકડી જેવી થઈ ગયેલી જોઈ ગીતાબહેન પીળા પડી ગયાં.

‘હાસ્તો. મેં જિમ જોઈન કર્યું છે. હાઈલ્લા.. જો ને, છ મહિનામાં બાર કિલોમીટર ઉતાર્યું. ઈચ્છા હોય તો તું પણ જોઈન કર. પછી જો કમાલ.’

વિભા શાળામાં હતી ત્યારથી કિલોગ્રામ અને કિલોમીટર વચ્ચેના ભેદ પારખવામાં થાપ ખાઈ જતીઃ કિલો એટલે કિલો વળી.

ગીતાબહેન જોઈ જ રહ્યાં: ‘એટલે બાર કિલોમીટર ચાલવાનું?’

‘હાઈલ્લા, ઉતારવાનું.’

કઈ સ્ત્રીને સુડોળ દેખાવાની ઈચ્છા ન હોય? એમાંય બહેનપણીને પાતળી થયેલી જોઈને ગીતાબહેનનેય શૂરાતન ચડ્યું.

‘એમ?’ ગીતાબહેનને બહેનપણીની વાત સટ કરતી ગળા હેઠળ ઊતરી ગઈઃ ‘ભલા, એ ઉતારે તો હું કેમ નહીં.’ વિચારીને શરીર પર જામેલી ચરબી ઉતારવા ગીતાબહેન ઘર નજીકના જ એક મકાનના બીજા માળે આવેલા બૉડી ઈન શેપ જિમનાં પગથિયાં ચઢી ગયાં. જિમ જોઈન કરવાના ભગીરથ કાર્યમાં બહેનપણીનો સંગાથ હતો. કસરત કરવામાં કંપની હોય તો ઓર મજા આવે. સખીઓ સાથે રસપૂર્વક વાતોના વડા કરવાથી પગે ચડેલા ગોટલા પણ ભલી જવાય.

આશીની મદદથી બીજે દિવસે જિમમાં પહેરવાનાં ખાસ વસ્ત્રો એટલે કે ટી-શર્ટ તેમ જ સ્ટ્રેચેબલ ટાઈટ્સની ખરીદી પણ થઈ ગઈ. નવી ખરીદેલી ડફલબૅગમાં કાંસકો, નૅપકીન, બૉડીસ્પ્રે, પાણીની બૉટલ મૂકી, પગમાં નવાંનક્કોર સ્નીકર્સ ચઢાવીને ગીતાબહેન વજન ઘટાડવાનું મહાકર્મ આચરવા સુસજ્જ થઈ ગયાં.