ચેલા ૮૫ના... ગુરુ ૪૫ના...

જેને કંઈ કરવું હોય એને સમયકાળનાં કે ઉંમરનાં બંધન નડતાં નથી. જેને કંઈ કરવું નથી એને આ પૃથ્વી પરનાં બધાં બંધન નડે છે એ ઉક્તિનું જ્વલંત ઉદાહરણ છે પાલનપુરના કર્મયોગી ડૉ. વિક્રમ મણિભાઈ મહેતા.

- કેતન મિસ્ત્રી (મુંબઈ)

થોડા દિવસ પહેલાં મુંબઈમાં મોટી રાજકીય ઊથલપાથલ થઈ ત્યારે એ મહાનાટકના કેન્દ્રમાં હતા રાષ્ટ્રવાદી કોંગ્રેસ પાર્ટી (એનસીપી)ના સ્થાપક-પ્રમુખ શરદ પવારના ભત્રીજા અજિત પવાર. કાકા સામે બળવો પોકારી ભારતીય જનતા પક્ષ સાથે બેસી જનારા અજિતભાઉએ (શરદ પવારને) કહ્યું કે તમે ૮૩ના થયા. જરા તો અટકો હવે.

- તો શરદ પવારે કહ્યું: ‘ન તો હું ટાયર્ડ છું, ન રિટાયર્ડ છું.. હું તો એક ફાયર છું.’ 

જો કે આપણે મહારાષ્ટ્રના રાજકારણની વાત કરવી નથી. આપણે વાત કરવી છે વહેતી થયેલી ચર્ચાનીઃ રાજકારણ કે બીજાં ક્ષેત્રમાં નિવૃત્તિની કોઈ વય હોવી જોઈએ? સાઠ વટાવ્યા બાદ સવારે બગીચામાં સમવયસ્કો સાથે કબજિયાતમાં ત્રિફળા બેટર કે ઈસબગુલ એની ચર્ચા કરવી? કે પછી શરીર-મન થાકે નહીં ત્યાં સુધી કામ કરવું? નવી પેઢીને અનુભવના ભાથામાંથી મૂલ્યવાન દિશાદર્શન કરવું? જેમ કે અજિત પવારનાં વ્યંગબાણનો શરદ પવારની પુત્રી સુપ્રિયા સુળેએ જવાબ આપતાં કહ્યું કે એવું જ હોય તો રતન ટાટા (૮૫), અમિતાભ બચ્ચન (૮૦), કોરોનાની વેક્સિન બનાવનારા, દુનિયાના સૌથી મોટા રસી ઉત્પાદક સિરમ ઈન્સ્ટિટ્યૂટના ચૅરમૅન-મૅનેજિંગ ડિરેક્ટર સાયરસ પૂનાવાલા (૮૨)નું શું?

બસ, વાત આ જ છેઃ એવા કર્મયોગી, જેમની ડિક્શનેરીમાં ટાયર્ડ કે રિટાયર્ડ જેવા શબ્દ જ નથી. એ તો બસ, સદાય વિવિધ પ્રવૃત્તિમાં વ્યસ્ત અને જીવનમાં મસ્ત રહે છે. આવા જ એક યુવાન વડીલનું નામ છેઃ ડૉ. વિક્રમ મણિભાઈ મહેતા.

આજથી ૪૦ વર્ષ પહેલાં વિક્રમભાઈએ પુણેની સાવિત્રીબાઈ ફલે યુનિવર્સિટી (પહેલાંની યુનિવર્સિટી ઑફ પુણે)માંથી પ્રથમ પીએચ.ડી.ની ડિગ્રી ડૉ. એમ.એસ. ગોસાવીના માર્ગદર્શન હેઠળ મેળવી. ૨૦૧૮માં આ જ યુનિવર્સિટીમાંથી બીજી પીએચ.ડી.ની ડિગ્રી હાંસલ કરી, જેનો વિષય હતોઃ સ્ટડી ઑફ ઍડ્મિનિસ્ટ્રેટિવ પ્રોબ્લેમ્સ ઑફ પબ્લિક ટ્રસ્ટ મૅનેજિંગ હેલ્થકૅર સેક્ટર ઈન ગુજરાત. ડૉ. ચંદ્રકાંત રાવલના માર્ગદર્શન હેઠળ આ મહાનિબંધ માટે ડૉ. વિક્રમ મહેતાએ ગુજરાતની પચ્ચીસથી ૧૦૦ બેડની ધર્માદાની હૉસ્પિટલોને આવરી લીધી હતી.