திருவண்ணாமலை தீபத்திருவிழாவுக்கு 4,089 சிறப்பு பஸ்கள், 22 ரயில்கள்

பஞ்சபூத தலங்களில் அக்னி தலமாகவும், ஆறு ஆதார தலங்களில் மணிப்பூரக தலமாகவும், நினைக்க முக்தித்தரும் திருத்தலமாகவும் திகழ்கிறது திருவண்ணாமலை அண்ணாமலையார் திருக்கோயில்.

உமையாளுக்கு இடபாகம் அருளியதும், திருமாலுக்கும் நான்முகனுக்கும் ‘தான்’ எனும் அகந்தை நீக்கி ஜோதிப்பிழம்பாக காட்சியளித்ததும் இங்குதான். தென்னகத்து கயிலாயம் என போற்றப்படும் திருவண்ணாமலையில் காட்சிதரும் மலையே மகேசன் திருவடிவாகும்.

அடி முடி காணாத பரம்பொருளாக, லிங்கோத்பவ மூர்த்தியாக சிவபெருமான் எழுந்தருளி, ஜோதி வடிவாக உயர்ந்து நின்ற திருவடிவமே அண்ணாமலை. திருவண்ணாமலையில் ஆண்டுதோறும் கார்த்திகை மாதத்தில், கிருத்திகை தினத்தில் நடைபெறும் மகாதீபப் பெருவிழா உலக பிரசித்தி பெற்றது. மகா தீபத்தன்று அதிகாலை 4 மணிக்கு திருக்கோயிலில் பரணி தீபமும், அன்று மாலை 6 மணிக்கு 2668 அடி உயர மலை உச்சியில் மகா தீபமும் ஏற்றப்படும். ஜோதிப்பிழம்பாக இறைவன் காட்சியளிக்கும் தீபத்தை தரிசனம் செய்வது அகஇருளை நீக்கும் ஆன்மிக அனுபவமாகும்.

இந்நிலையில், இந்த ஆண்டு கார்த்திகை தீபத்திருவிழா கடந்த 4ம் தேதி காலை 6.00 மணி முதல் 7.25 மணிக்குள் தங்கக் கொடிமரத்தில் கொடியேற்றத்துடன் தொடங்கியது. தொடர்ந்து 10 நாட்கள் விமரிசையாக நடைபெற உள்ளது. வரும் 13ம் தேதி 2668 அடி உயர மலை உச்சியில் மகா தீபமும் ஏற்றப்பட உள்ளது. இந்த ஆண்டு தீபத்திருவிழாவை தரிசனம் செய்ய சுமார் 40 லட்சத்துக்கும் மேற்பட்ட பக்தர்கள் வருகைதர வாய்ப்பு இருக்கும் என்பதால், அடிப்படை வசதிகள் மற்றும் பாதுகாப்பு முன்னேற்பாடுகளில் தனி கவனம் செலுத்தப்படுகிறது.