சிடி ஸ்கேன் இயந்திரம் வாங்க வந்த நபரிடம் போலீஸ் என கூறி ₹20 லட்சம் பறித்த வருமான வரித்துறை அதிகாரிகள் 3 பேர் அதிரடி கைது

வாணியம்பாடியில் இருந்து சிடி ஸ்கேன் வாங்க வந்த நபரிடம் போலீஸ் என கூறி காரில் கடத்திச் சென்று ரூ.20 லட்சம் பணம் பறித்த வருமான வரித்துறை அதிகாரிகள், திருவல்லிக்ேகணி சிறப்பு எஸ்ஐ உட்பட 4 பேரை போலீசார் அதிரடியாக கைது செய்தனர்.

அவர்களிடம் இருந்து ரூ.20 லட்சம் பணம் மற்றும் வழிப்பறிக்கு பயன்படுத்திய கார் பறிமுதல் செய்யப்பட்டது. திருப்பத்தூர் மாவட்டம் வாணியம்பாடி பகுதியை சேர்ந்த தொழிலதிபர் ஜூனைத் அகமது. இவர் சிடி ஸ்கேன் மெஷின் வாங்குவதற்காக அவரிடம் பணியாற்றும் சென்னை வண்ணாரப்பேட்டை நடராஜன் தெருவை சேர்ந்த முகமது கவுஸ் என்பவரிடம் கடந்த 15ம் தேதி ரூ.20 லட்சம் பணத்தை கொடுத்து சென்னைக்கு அனுப்பியுள்ளார். அதன்படி முகமது கவுஸ் பணத்துடன் 16ம் தேதி இரவு திருவல்லிக்கேணியில் ஹரீஷ் என்பவரிடம் ரூ.10 லட்சம் கொடுக்க வேண்டி வாலாஜா சாலையில் நடந்து சென்று கொண்டிருந்தார். அப்போது ஓமந்தூரார் அரசு மருத்துவமனை அருகே வரும் போது, காவலர் சீருடையில் பைக்கில் வந்த நபர் ஒருவர், முகமது கவுஸை வழிமறித்து நான் போலீஸ், என கூறி அவர் வைத்திருந்த பையை சோதனை செய்தனர்.