வதந்தியும் உண்மையும்!

எச்எம்பி தீநுண்மி: சாதாரண சளித் தொற்று

- தொகுப்பு: ஆ.கோபிகிருஷ்ணா

இந்தியாவில் மூலைமுடுக்கெல்லாம் பாரபட்சமின்றி கடந்த 25 ஆண்டுகளாக வியாபித்த மிகச் சாதாரண சளித் தொற்றுதான் இப்போது எச்எம்பி தீநுண்மி (ஹியூமன் மெட்டா நியூமோ வைரஸ்) என்ற பெயரில் பெரிதுபடுத்தப்படுகிறது.

சீனாவில் திடீரென அந்தப் பாதிப்பு அதிகரித்ததைத் தொடர்ந்து, கரோனா போன்ற பேரிடர் சூழல் உருவாகிவிடுமோ என்ற அச்சம் உலக நாடுகளை ஆட்கொண்டதே அதற்குக் காரணம். ஆனால், சீனாவிலும் பனிக் காலத்தில் பரவும் வழக்கமான நோய் தொற்றுதான் இது என்று அந்நாட்டு சுகாதாரத்துறை தெரிவித்துள்ளது.

இந்தியா உள்ளிட்ட பல நாடுகளில் பேசுபொருளாக மாறியுள்ள எச்எம்பிவி அச்சப்படும் அளவுக்கு அவ்வளவு வீரியமான தொற்றாக அறியப்படவில்லை. காய்ச்சல், சளி, தொண்டை வறட்சி, மூக்கடைப்பு, மூச்சிரைப்பு ஆகிய சில பாதிப்புகளை மட்டுமே அளிக்கும் தொடக்க நிலையிலான தீநுண்மித் தொற்று அது.

ஒருவரது எச்சில், இருமல், தும்மல், சளி போன்றவற்றிலிருந்து வெளியேறும் நீர்த்திவலைகள் மூலம் பிறருக்கு எச்எம்பி தீநுண்மி பரவுகிறது.