மக்கள்தொகைப் பெருக்கமும், அணுக்கமும்...

நாடு முழுவதும் எதிர்பார்க்கப்படும் மக்களவைத் தொகுதி மறுசீரமைப்புக்கு தமிழ்நாட்டில் பலத்த எதிர்ப்பும், அதுகுறித்த விவாதமும் சூடுபிடித்திருக்கிறது.

- ப.இசக்கி

தென் மாநிலங்களில் மக்கள்தொகையைப் பெருக்க முதல்வர்கள் விடுக்கும் வேண்டுகோளுக்கும், அறிவிக்கவும் திட்டங்களுக்கும் பலன் கிடைக்குமா என்ற கேள்வி எழுகிறது.

அண்மையில் நாகப்பட்டினத்தில் திருமண விழா ஒன்றில் கலந்து கொண்ட முதல்வர் மு.க. ஸ்டாலின், மணமக்கள் காலம் தாழ்த்தாமல் விரைவாக குழந்தைகளைப் பெற்றுக் கொள்ள வேண்டும்; அதிக மக்கள்தொகை இருந்தால்தான் அதிக எம்.பி.க்களைப் பெற முடியும் எனக் கூறி ஆசி வழங்கினார்.

ஆந்திர மாநில முதல்வர் சந்திரபாபு நாயுடு, இந்த முறை ஆட்சிப் பொறுப்பேற்ற உடன் கடந்த 30 ஆண்டுகளாக நடைமுறையில் இருந்த இரு குழந்தைகளுக்கு மேல் உள்ள பெற்றோர் உள்ளாட்சி அமைப்புகளில் போட்டியிட முடியாது என்ற சட்டத்தைத் திருத்தினார். இனிமேல் இரு குழந்தைகளுக்கு மேல் உள்ள பெற்றோர் உள்ளாட்சித் தேர்தலில் போட்டியிட முடியும். அது மட்டுமல்ல, இரு குழந்தைகளுக்கு மேல் இருந்தால்தான் தேர்தலில் போட்டியிட முடியும் என சட்டத்திருத்தம் கொண்டுவரத் திட்டமிட்டு வருவதாகவும் தெரிவித்துள்ள சந்திரபாபு நாயுடு, பெரிய குடும்பங்களுக்கு சலுகை விலையில் அரிசி வழங்க ஆலோசித்து வருவதாகவும் தெரிவித்துள்ளார்.