അതിജീവിതയുടെ പോരാട്ടത്തിൽ അടിതെറ്റി അമ്മ പൊട്ടിച്ചെറിഞ്ഞു ആണധികാരം

പ്രസിഡന്റ് മോഹൻലാലും ഒഴിഞ്ഞു; ഭരണസമിതി പിരിച്ചുവിട്ടു

കൊച്ചി: അതിജീവിത തുടങ്ങിവെച്ച പോരാട്ടത്തിനൊടുവിൽ ഹേമ കമ്മിറ്റി റിപ്പോർട്ടും നടന്മാർക്കെതിരായ ലൈംഗികാരോപണങ്ങളും പിടിച്ചുലച്ചതിന് പിന്നാലെ ചലച്ചിത്ര നടീനടന്മാരുടെ സംഘടനയായ 'അമ്മ'യിൽ കൂട്ടരാജി. പ്രസിഡന്റ് മോഹൻലാൽ അടക്കം മുഴുവൻ ഭാരവാഹികളും പദവി ഒഴിഞ്ഞു. അമ്മയുടെ ഭരണസമിതിയും പിരിച്ചുവിട്ടു. ചൊവ്വാഴ്ച ഓൺലൈനായി ചേർന്ന എക്സിക്യൂട്ടിവ് യോഗത്തിലായിരുന്നു മോഹൻലാലിന്റെ രാജിപ്രഖ്യാപനം. ചിലർ പിന്തിരിപ്പിക്കാൻ ശ്രമിച്ചെങ്കിലും അദ്ദേഹം ഉറച്ചു നിന്നതോടെ ഒപ്പമുള്ളവരും രാജിക്ക് സന്നദ്ധരായി. ഇതോടെ 17 അംഗ എക്സിക്യൂട്ടിവ് കമ്മിറ്റി ഇല്ലാതായി.