സങ്കടക്കലാശം

സന്തോഷ് ട്രോഫിയിൽ കേരളത്തിന്റെ അപരാജിത യാത്രക്ക് ഫൈനലിൽ അന്ത്യം (0 - 1)

- ഇഖ്ബാൽ ചേന്നര

സന്തോഷ് ട്രോഫിയിൽ കേരളത്തിന് പുതുവത്സര സമ്മാനമെന്ന മോഹം പൊലിഞ്ഞു. രണ്ടാം പകുതിയിൽ കേരളത്തിനെതിരെ ഇരമ്പിക്കയറിയ വംഗനാട്ടുകാർ 33-ാം കിരീടത്തിൽ മുത്തമിട്ടു. ഗച്ചിബൗളിയിലെ ജി.എം.സി ബാലയോഗി സ്റ്റേഡിയത്തിൽ ചൊവ്വാഴ്ച രാത്രി നടന്ന 78-ാം സന്തോഷ് ട്രോഫി ഫൈനലിൽ കളിയുടെ അന്ത്യനിമിഷത്തിൽ കുറിച്ച ഒറ്റ ഗോളിന്റെ മികവിലാണ് കിരീടം കേരളത്തിൽ നിന്ന് കൊത്തിയെടുത്തത്. വിജയികൾക്കായി സൂപ്പർ സ്ട്രൈക്കർ റോബി ഹൻസ്ദാ (90+ 4) ഗോൾ നേടി. ടൂർണമെന്റിൽ 12 ഗോളുകളുമായി ഹൻസ്ദാ തന്നെയാണ് ടോപ് സ്കോറർ. കളിയിലെയും ടൂർണമെന്റിലെയും താരവുമായി ദാ.

ആദ്യ പകുതിയിൽ കേരള കുതിപ്പ്

സെമി ലൈനപ്പിൽ നിന്ന് ഒരു മാറ്റവുമായാണ് കേരളം ഇറങ്ങിയത്. ചുവപ്പുകാർഡ് മൂലം സസ്പെൻഷനിലായ മനോജിനു പകരം ആദിൽ അമൻ സെന്റർ ബാക്കിൽ ക്യാപ്റ്റൻ സഞ്ജുവിന് കൂട്ടായെത്തി. ബംഗാൾ നിരയിൽ കോച്ച് സഞ്ജയ് സെൻ രണ്ട് മാറ്റംവരുത്തി. പരിക്കേറ്റ പ്ലേമേക്കർ നരോ ഹരി ശ്രേഷ്ഠക്ക് പകരം ഫോർവേഡായി അബൂസുഫിയാനെയും ഇസ്റഫുൽ ദിവാനു പകരം മിഡ്ഫീൽഡർ ആദിത്യ താപ്പയെയും ഇറക്കി. മൂന്നു ഫോർവേഡുകളെ മുന്നിൽ നിരത്തി 4-3-3 ശൈലിയിൽ ബംഗാളും അജ്സലിനെ കുന്തമുനയാക്കി 5-4-1 ശൈലിയിൽ കേരളവും പടയൊരുക്കി.