അഞ്ചാംമൊഞ്ച്

ചൈനയെ വീഴ്ത്തി ഇന്ത്യ അഞ്ചാമതും ഏഷ്യൻ ചാമ്പ്യൻസ് ട്രോഫി ചാമ്പ്യന്മാർ

ബെയ്ജിങ്: ഹോക്കിയിൽ വൻകരയുടെ തപുരാക്കന്മാരായി ഉടനൊന്നും മറ്റാരുമെത്താനില്ലെന്ന വിളംബരമായി ഏഷ്യൻ ചാമ്പ്യൻസ് ട്രോഫിയിൽ ഇന്ത്യക്ക് അഞ്ചാം കിരീടം. അങ്കം കളത്തിലെങ്കിൽ കളിയേതായാലും ഒരു കൈ നോക്കാമെന്ന മനക്കരുത്തുമായി ആദ്യാവസാനം പൊരുതിയ ആതിഥേയരായ ചൈനയെ എതിരില്ലാത്ത ഒരു ഗോളിന് കടന്നാണ് ഇന്ത്യ കിരീടത്തുടർച്ചയിലേക്ക് ജയിച്ചുകയറിയത്. ആദ്യമൂന്ന് പാദങ്ങളും ഗോളൊഴിഞ്ഞ് നിൽക്കുകയും നിയന്ത്രണത്തിലും നീക്കങ്ങളിലും എതിരാളികൾ ഒപ്പം നിൽക്കുകയും ചെയ്ത കളിയിലായിരുന്നു പ്രതിരോധ താരം ജഗ് രാജ് സിങ് നേടിയ ഫീൽഡ് ഗോളിൽ ഇന്ത്യയുടെ വിജയാഘോഷം. എല്ലാ മത്സരങ്ങളും ജയിച്ച് കിരീടമുയർത്തുകയെന്ന അപൂർവ നേട്ടം കൂടി ഇതോടെ ഇന്ത്യക്ക് സ്വന്തം.