வயது முதிர்வால் காலமான மன்மோகன்சிங் உடலுக்கு நாளை இறுதிச்சடங்கு!

முன்னாள் பிரதமர் மன்மோகன் சிங் வயது மூப்பு மற்றும் உடல்நலக் குறைவால் நேற்று இரவு மறைந்தார்.

இதையடுத்து 7 நாள் துக்கம் அனுசரிக்கப்படுகிறது என மத்திய அரசு அறிவித்துள்ளது. முழு அரசு மரியாதையுடன் நாளை இறுதிச் சடங்கு நடைபெறுகிறது. இதில் பல்வேறு கட்சிகளைச் சேர்ந்த தலைவர்கள் பங்கேற்கின்றனர்.

அதிகாரியாக பணியாற்றி வந்த ஒருவர் அரசியலில் அடியெடுத்து வைத்து நிதி அமைச்சராகவும், பிரதமராகவும் உயர்ந்தார் என்பதை மன்மோகன் சிங் மெய்ப்பித்துக் காட்டினார். பொருளாதார தாராளமயமாக்கல் இன்று உலகம் முழுவதும் வியாபித்துள்ளது. இதற்கு இந்தியாவில் வலுவான அடித்தளத்தை அமைத்தவர் மன்மோகன் சிங் என்பதை யாரும் மறுக்க முடியாது.

நிகழ்கால ஊடகம் என்னைப் பற்றி எவ்வாறு விமர்சித்தாலும் இந்திய வரலாறு எனது பங்களிப்பை கனிவுடன் கவனத்தில் எடுத்துக்கொள்ளும் என்று மன்மோகன் சிங் கூறியது அவரது மனோபாவத்தையும் இந்திய மக்களின் உளப்பாங்கையும் துல்லியமாக பிரதிபலித்தது. இது இப்போது நிரூபணமாகிவிட்டதை கண்கூடாகப் பார்க்கிறோம்.

2004 முதல் 2014 வரை பிரதமராக இருந்த மன்மோகன் சிங் (வயது 92), இந்த ஆண்டு தொடக்கத்தில் ராஜ்யசபாவில் இருந்து ஓய்வு பெற்றார். இந்தியாவின் ஒரே சீக்கிய பிரதமராக இருந்த மன்மோகன், நரசிம்ம ராவ் அமைச்சரவையில் 1991ல் நிதியமைச்சராக பொறுப்பு வகித்தார்.