சட்டசபை உரை புறக்கணிப்பு: ஆளுநரைக் கண்டித்து தி.மு.க.ஆர்ப்பாட்டம்!

மாவட்ட தலைநகரங்களில் நடந்தது!!

தமிழக சட்டசபையில் தனது உரையை வாசிக்காமல் ஆளுநர் ஆர்.என். ரவி புறக்கணித்தார்.

இதற்கு பல்வேறு தலைவர்களும் கண்டனம் தெரிவித்தார்கள். அவரது செயல் சிறு பிள்ளைத்தனமானது என முதலமைச்சர் ஸ்டாலின் குறிப்பிட்டார். இந்த நிலையில் அவரை கண்டித்து மாவட்ட தலைநகரங்களில் தி.மு.க. சார்பில் ஆர்ப்பாட்டம் நடந்தது.

தமிழக அரசுக்கும், ஆளுநர் ஆர்.என். ரவிக்கும் இடையே கருத்து மோதல் தொடர்கிறது. தமிழக சட்டசபையின் இந்த ஆண்டின் முதலாவது கூட்டம் நேற்று தொடங்கியது.

இதில் ஆளுநர் பங்கேற்று அரசின் உரையை வாசிப்பது வழக்கம். அதன்படி ஆளுநர் ஆர்.என். ரவி நேற்று சட்டசபைக்கு வந்தார். தமிழ்த்தாய் வாழ்த்து பாடப்பட்டது.

அதன்பிறகு, தேசிய கீதம் இசைக்கப்படவில்லை என கூறி உரையை வாசிக்காமல் வெளியேறிவிட்டார்.

இதன்மூலம், தேசிய கீதத்திற்கும் அரசமைப்பு சட்டத்திற்கும் அவமானம் ஏற்படுத்தப்பட்டதாக அவர் குற்றம் சாட்டினார். ஆனால், கவர்னர் உரை முடிந்தபிறகு தேசிய கீதம் பாடப்படுவது தான் தமிழக சட்டசபையின் மரபு என சபாநாயகர் தெரிவித்தார்.