આજે લાભ પાંચમ: ‘મિની વેકેશન’ પૂર્ણ છતાં કેટલાક વેપારીઓ હજુ રજાના મૂડમાં, ગણતરીની દુકાનો ખુલ્લી

દિવાળીના તહેવારોની પૂર્ણાહુતિઃ શ્રીસૂક્તનો પાઠ કરવાનો મહિમાઃ મંદિરોમાં વિશિષ્ટ આયોજન, વેપારીઓ પૂજન બાદ નવા વર્ષમાં વેપારની શરૂઆત કરશે

અમદાવાદ, શનિવાર

આજે કારતક સુદ પાંચમ એટલે કે લાભ પાંચમ છે અને તેની સાથે જ દિવાળીના તહેવારોની સમાપ્તિ થઇ છે. નવું વર્ષ વધારે શુભ અને લાભદાયી પુરવાર થાય તેવી પ્રાર્થના સાથે વેપારીઓ વેપાર-ધંધાનાં મુહૂર્ત કરી રહ્યા છે, છતાંય મોટા ભાગના વેપારીઓ હજુ ૨જાના મૂડમાં છે. તેથી બજાર સુસ્ત છે, માત્ર ગણતરીની દુકાનો ખુલ્લી છે. આવતી કાલે રવિવાર હોવાથી મોટા ભાગની દુકાનો તેમજ માર્કેટ સોમવારથી જ પૂર્વવત્ ધમધમવા લાગશે.

કારતક માસના શુક્લ પક્ષની પંચમી તિથિને લાભ પાંચમ કહેવામાં આવે છે. દિવાળી પછી આવતી પંચમીએ જો કોઇ નવો વેપાર કે મુહૂર્ત કરવામાં આવે તો તેમાં લાભ જ થતો હોવાની વિશિષ્ટ પરંપરા-માન્યતા છે. વેપારીઓ પાંચમના દિવસે હિસાબના ચોપડાની સાથે ભગવાન ગણેશની પણ પૂજા કરે છે, જેથી તેમના માટે નવું વર્ષ લાભદાયી નીવડે છે.