હાડ થિજાવતી ઠંડી અને કોરોનાની બીકથી કાંકરિયા કાર્નિવલમાં મલાકાતીઓની ભીડ ઘટી

૨૫ ડિસેમ્બરના કાર્નિવલના ઉદ્ઘાટનના દિવસે જ સૌથી વધુ ૧.૭૫ લાખ મુલાકાતીઓ નોંધાયા

અમદાવાદ, ગુરુવાર

મ્યુનિસિપલ સત્તાવાળાઓ કોર્પોરેશનના દ્વારા કોરોના મહામારીના કારણે બે વર્ષ સુધી બંધ રખાયેલા કાંકરિયા કાર્નિવલનો આ વખતે ભભકાદાર રીતે પ્રારંભ કરાયો છે. છેક વર્ષ ૨૦૦૮થી દર વર્ષની તા. ૨૫થી ૩૧ ડિસેમ્બર સુધી કાંકરિયા લેકફ્રન્ટ ખાતે સાત દિવસનો રંગારંગ કાર્નિવલ યોજાઈ રહ્યો છે. અમદાવાદ ઉપરાંત ગુજરાતભરમાંથી હજારો મુલાકાતીઓ કાર્નિવલનો આનંદ માણવા દર વર્ષે આવતા રહ્યા છે.

જોકે આ વખતે કાર્નિવલમાં હાડ થિજાવતી ઠંડી અને નવેસરથી ઊભી થયેલા કોરોનાની દહેશતના પગલે મુલાકાતીઓની સંખ્યામાં ઘટાડો નોંધાયો છે. અમદાવાદીઓમાં કાંકરિયા કાર્નિવલે રીતસરનું ઘેલું જ લગાડ્યું છે. કોરોનાની પહલા ડિસેમ્બરની શરૂઆતથી જ લોકો કાર્નિવલની ઉત્સાહભેર પ્રતીક્ષા કરતા હતા. બે વર્ષ સુધી કાર્નિવલને કોરોનાના કારણે બંધ રાખનાર મ્યુનિ. સત્તાધીશોએ આ વર્ષે કાર્નિવલને ધમાકેદાર રીતે ઉજવવા માટે છેક નવેમ્બર મહિનાથી વિવિધ તૈયારીઓ આરંભી દીધી હતી. અમદાવાદીઓ પણ કાર્નિવલની મોજ માણવા ઉત્સુક બન્યા હતા.