ഹൈന്ദവവൽക്കരിക്കപ്പെടുന്ന രണ്ട് മതാതീത കേന്ദ്രങ്ങൾ

നേരിന് നേരേ ...

- ആർ. പവിത്രൻ

വൈദിക സംസ്ക്കാരത്തെ പുറത്തുനിർത്തിയിരുന്ന, അഥവാ ഹൈന്ദവ ആചാര-വിശ്വാസപ്രമാണങ്ങളും, രീതിക്രമങ്ങളും പിൻതുടരാത്ത, തെക്കൻ കേരളത്തിലെ രണ്ട് പ്രമുഖമായ തീർത്ഥാടന കേന്ദ്രങ്ങൾ സാവധാനം ഹിന്ദു ആരാധനാകേന്ദ്രങ്ങളായി മാറ്റപ്പെട്ടുകൊണ്ടിരിക്കുന്നു. മതപരമായ വിശ്വാസ പ്രശ്നം എന്ന രീതിയിൽ ലഘുവായി കാണേണ്ട വിഷയമല്ലിത്. ഈ നീക്കത്തിന് പിന്നിൽ ഒളിഞ്ഞിരി ക്കുന്ന നിഗൂഢ ലക്ഷ്യം അത്യന്തം വിപൽക്കരവും പ്രതിലോമപരവുമാണ്. പല ഉന്നങ്ങളുള്ള, നിശബ്ദമായ ഈ നീക്കം ഒട്ടും സുതാര്യമല്ല. ഹിന്ദുമതവർഗ്ഗീയപ്പട്ടം ചാർത്തിക്കൊടുത്തിട്ടുള്ള ആർ.എസ്.എ സ്സിനോ, അതിന്റെ രാഷ്ട്രീയമുഖമായി ചിത്രീകരിക്കപ്പെടുന്ന ബി.ജെ.പിക്കോ ഇതിൽ പങ്കില്ല എന്നതാണ് ഇതിൽ തറഞ്ഞുകിടക്കുന്ന അപകടകരമായ വസ്തുത. നിർഭാഗ്യവശാൽ ഇടതുപക്ഷ രാഷ്ട്രീയപ്പാർട്ടിക ളോ, അവരുടെ ബുദ്ധിജീവികേന്ദ്രങ്ങളോ ഇത് മനസ്സിലാക്കുന്നില്ല.

ആദിശങ്കരാചാര്യരിലൂടെ ക്രോഡീകരിക്കപ്പെട്ട ഹിന്ദുമതം സവർണ്ണമതമാണെന്നും, ജന്മത്തെ അടിസ്ഥാനമാക്കി മനുഷ്യനെ വിഭജിക്കുന്ന അധികാര വർഗ്ഗ മതമാണെന്നുമുള്ള വിമർശനം പുതുതല്ല. ചാതുർവർണ്ണ്യമാണ് അതിന്റെ അകക്കാമ്പ്. താഴ്ത്തപ്പെട്ട ജാതിയിൽപ്പെട്ട വരോ, അദ്ധ്വാനം വിറ്റ് പശിയടക്കുന്ന തൊഴിലാളിവർഗ്ഗമോ ഇതിൽപ്പെടില്ല. ആ കാഴ്ചപ്പാടിൽ പിന്നോക്കവിഭാഗവും ദലിതരും ഹിന്ദുമതത്തിൽപ്പെടില്ലെന്നാണ് ഇതിന്റെ വക്താക്കൾ വ്യാഖ്യാനിക്കുന്നത്.(കാഞ്ചാ ഇലയ്യയുടെ Why lam not a Hindu (എന്തുകൊണ്ടു ഞാനൊരു ഹിന്ദുവല്ല) എന്ന പ്രസിദ്ധമായ ഗ്രന്ഥത്തിൽ ഇക്കാര്യം വിശദമായി വിലയിരുത്തപ്പെടുന്നുണ്ട്.