అమ్మంటే అమ్మ...!

అమ్మంటే ప్రేమ... అమ్మంటే త్యాగం... అమ్మంటే సేవ...అమ్మంటే సహనం! ఇన్ని మహనీయ గుణాలు మూర్తీభవించిన ఆమెకు ఆమే సాటి! అమ్మస్థానం హిమగిరిలా అతి మహోన్నతం!

- శ్రీమతి టి. లక్ష్మి

ఈ అవనిపై అమ్మను మించిన దేవత లేదు.పిల్లల ప్రతీ విజయం వెనుక పరోక్ష ప్రేరణ కన్నతల్లిదే! పుత్రోత్సాహం తండ్రిదైనా, పుత్ర విజయం మాత్రం తల్లిదే! 

జగద్గురువులైనా, మహా సామ్రాజ్యాధినేతలైనా, ప్రపంచాన్ని శాసించగల నేతలైనా, వీరాధివీరులైనా తమ తమ శక్తిసామర్థ్యాలు మరచి, పసిపిల్లలై ఒదిగేది అమ్మ చల్లని ఒడిలోనే! జీవితపు బరువు బాధ్యతలతో ఒడిదుడుకుల నడుమ నలిగిపోయే సామాన్యుడికి, వాటన్నిటినీ మరపించి, చేయూతనిచ్చి, 'కన్నా నీకు నేనున్నానంటూ అనుక్షణం నీడై నడిచేది అమ్మతోడు! జననమరణాలు లేని నిరాకార పరబ్రహ్మం సాకారం దాల్చడానికైనా... నవ మాసాలూ మోసి, ప్రసవ వేదన అనుభవించి, జన్మనిచ్చేది అమ్మే!

స్కందశ్చ భగవాన్ దేవః సోమశ్చ స బృహస్పతిః 

శైలాః సర్వే సముద్రాశ్చ రాజా వరుణ ఏవ చ I...

త్రీన్ విక్రమాన్ ప్రక్రమతో విష్ణోరమితతేజసః

యదాసీన్మంగళం రామ | తత్తే భవతు మంగళమ్ ॥ 

నాయనా! శ్రీరామా! కుమారస్వామి, చంద్రుడు, బృహస్పతి, సప్తర్షులు, నారదులవారు, పర్వతాలు, సముద్రాలు, వరుణుడు, భూమ్యాకాశాలు, సమస్త గ్రహాలు వనవాస కాలమున నిన్ను రక్షించుగాక! మూడడుగులతో ముల్లోకాలనూ ఆక్రమించిన శ్రీమహావిష్ణువును ఆశ్రయించిన మంగళములన్నీ నీకునూ లభించుగాక! అంటూ తనకు ప్రణమిల్లిన శ్రీరాముడిని కౌసల్యామాత ఆశీర్వదించగా, ఆ ఆశీర్వచనములే శ్రీరాముడికి సదా రక్షయై విజయాన్ని చేకూర్చాయి.

శ్రీమద్భాగవతంలో... బిడ్డలైన దేవతలను రాక్షసులు హింసిస్తూంటే, సహింపలేని తల్లి అదితి వారి క్షేమానికై మహావిష్ణువును ప్రార్థింపగా, ఆయన...

...భవదీయ గర్భమునఁ తేజోమూర్తినై జన్మించెదన్

నాకున్ వేడుకపుట్ట నీ సుతుఁడనై నర్తించి వర్తింపఁగాన్ ...

నా రూపము మానసించి నలినీ గర్భాగారంబు వచ్చి చొచ్చెద,

గారామునఁ బెంపవమ్మ కరుణన్ నన్నున్

అమ్మా! తేజోమూర్తినై నీ కడుపున జన్మిస్తాను. నీ ఒడిలో ఆడుకోవాలని ఎంతో మక్కువగా ఉంది. నా రూపాన్ని తలుచుకుంటూ ఉండు. నీ గర్భాన చేరుతాను. అప్పుడు గారాబంతో, కనికరంతో నన్ను కాపాడుమమ్మా..! అన్నాడు.