బంధాలు.. బంధుత్వాలు -

తనువుతోనే బంధుత్వాలు కలుగుతున్నాయి జీవునికి. అంటే, జీవునికి నిజానికి ఏ బంధుత్వాలూ లేవు.

- డాక్టర్ వెలుదండ సత్యనారాయణ

తీనువుతో కలుగు బాంధవ్యంబు లెల్ల

తనువుతో నశియించి ధరణిలో గలియు

తనువనిత్యము నిత్యంబు ఆత్మ యొకటి... అని చాలాకాలం క్రితం శ్రీకృష్ణావతారం” అనే చలనచిత్రంలో వినిపించేది.

తనువుతోనే బంధుత్వాలు కలుగుతున్నాయి జీవునికి. అంటే, జీవునికి నిజానికి ఏ బంధుత్వాలూ లేవు. శరీరం తీసుకుని భూమి మీద జన్మ ఎత్తిన మరుక్షణంలోనే తల్లి, తండ్రి, అన్న, అక్క.. ఇలా సవాలక్ష చుట్టరికాలు చుట్టుకుంటాయి. పుట్టిన జీవుడు వీరంతా నావాళ్ళు' అనుకుంటూ ఎదిగి తీరాలని ఆ బంధువర్గం భావిస్తుంది. అతడూ కిమ్మనకుండా అలాగే భావిస్తాడు. అదే ఎదుగుదల అనుకుంటాడు. భగవత్‌ బాంధవ్యం అంటే ఏమిటో తెలియకుండానే పోతుంది. భగవత్‌ సంబంధం కలవారే బంధువులన్న విషయం అతనికి తోచనే తోచదు. ఎవరూ చెప్పరు కూదా! వాళ్ళకూ తోచదు కాబట్టి!

మరొక చేదు విషయం ఏమిటంటే, ఈ బంధువులందరూ డబ్బు ఉన్నప్పుడే గౌరవిస్తారు. డబ్బు లేని రోజున ముఖం కూడా చూడరు. మనను పట్టించుకోరు. అంటే, వాళ్ళు డబ్బుకే విలువ ఇస్తున్నారు తప్ప వ్యక్తిత్వానికి కాదని తేలిపోతూనే ఉన్నది. అందుకే కదా...

ఎప్పుడు సంపద కలిగిన

నప్పుడు బంధువులు వత్తు రది యెట్లన్నన్‌

తెప్పలుగ చెరువు నిండిన

కప్పలు పదివేలు చేరు గదరా సుమతీ!