.వాళ్ళు నలిగిపోతున్నారు! . .

పంతొమ్మిది వందల ఇరవై నాలుగులో ప్రముఖ రచయిత గుడిపాటి వెంకటచలం గారు 'బిడ్డల శిక్షణ' అన్న పుస్తకం రాశారు.

- బి. సైదులు

నూరేళ్ళ క్రితం నాటి ఆ పుస్తకాన్ని తిరగేస్తుంటే ఆ దార్శనికుడి భావాలు నిత్యనూతనంగా అనిపించాయి.ఆ 'బిడ్డల శిక్షణ' పుస్తకంలో ముఖ్యంగా 'తల్లితండ్రులు' అన్న శీర్షిక కింద చలం గారు వెలువరించిన కొన్ని అభిప్రాయాలు పెద్దలందరూ కంఠోపాఠం చేయాల్సిన పాఠాలు. తమలో తాము ఆత్మావలోకనం చేసుకొని, ఆచరణలో పెట్టాల్సిన అమూల్యమైన అంశాలు. పెద్దల ఆధిపత్య పోరాటాల మధ్య ఇంట్లో పిల్లలు ఎంతగా నలిగిపోతున్నారో ఆయన ఆ పుస్తకంలో విస్పష్టం చేశారు. తమ కరకుదనంతో కన్నబిడ్డల మృదు సహజ స్వభావాలకు విరుద్ధమైన వాతావరణానికి కారణమవుతూ, కన్నవారు ఎన్ని పొరపాట్లు చేస్తున్నారో ఎత్తిచూపారు.మన మాటల కన్నా చేతల్నే పిల్లలు ప్రామాణికంగా తీసుకుంటారన్న విషయాన్ని తల్లితండ్రులు ఎందుకు గుర్తించలేక పోతున్నారోనని ఆయన ఆవేదన చెందారు.పిల్లల పెంపకంలో సహనం, నిగ్రహం ప్రధానమైన విషయాలనీ, మీరు శాంతంగా,ప్రశాంతంగా ఉండకుండా, మీ పిల్లల నుంచి వాటిని ఎలా ఆశించగలరనీ ఆయన ప్రశ్నించారు. చలంగారే జీవించి ఉంటే, నేటి నవతరం దంపతులకు మరిన్ని ఘాటైన సూచనలతో 'బిడ్డల శిక్షణ'కు కొనసాగింపును రచించి ఉండేవారేమో! ఎంతో విద్యావంతులైన దంపతులు కూడా తమ కోపతాపాల ప్రదర్శనలో ఏమాత్రం నిగ్రహం పాటించటం లేదు. ఫలితంగా ఇంట్లో పెద్దవాళ్ళ అభిప్రాయభేదాలు, ఆధిపత్య పోట్లాటల మధ్య బిడ్డలు నలిగిపోతున్నారు.

వారు విపరీతమైన మానసిక ఒత్తిళ్ళకు లోనవుతున్నారు. ఇలాంటి సమస్యతోనే తన వద్దకు వచ్చిన తల్లితండ్రులతో రామకృష్ణ సంఘ పదమూడవ సర్వాధ్యక్షులు స్వామి రంగనాథానందజీ మహరాజ్ "పిల్లల ముందు మీరు ఎలా ప్రవర్తిస్తున్నారో ఆత్మపరిశీలన చేసుకోండి. చేతులు కాలాక ఆకులు పట్టుకున్నట్లు తల్లడిల్లిపోవటం వల్ల ప్రయోజనం ఏమీ ఉండదు.చాలామంది తల్లితండ్రులు పిల్లల భవిష్యత్తుకు తాము మార్గనిర్దేశకులమన్న విషయాన్ని మరచిపోతున్నారు” అన్నారు.