தொடரும் நிலச்சரிவு, வடியாத வெள்ளம்...காரணம் என்ன?

வட தமிழ்நாட்டில் தாண்டவமாடிய ஃபெஞ்சல் புயல் எதிரொலியாக திருவண்ணாமலை மாவட்டத்தில் கிட்டத்தட்ட 2 நாட்களாக கனமழை கொட்டித் தீர்த்தது. இந்நிலையில், திருவண்ணாமலையின் தீபமலையில் திடீரென மண்சரிவு ஏற்பட ஆரம்பித்தது.

அடிவாரத்தில் வசித்து வந்த மக்கள் சுதாரிப்பதற்குள் 'சுமார் 40 டன் எடை கொண்ட பெரும் பாறை ஒன்று சரிந்து வந்து அபாயகரமான வகையில் நின்றுள்ளது.

மண் சரிவில் சிக்கிய 3 வீடுகளில் ராஜ்குமார் என்பவரின் வீடு முழுவதுமாக மண்ணுக்குள் புதைந்து போனது. இதில் வீட்டுக்குள் இருந்த ராஜ்குமார், அவரது மனைவி மீனா, மகன் கவுதம், மகள் இனியா, உறவுக்கார சிறுமிகள் மகா, வினோதினி, ரம்யா என 7 பேர் இறந்தனர்.

மலைச்சரிவுக்கு, செவ்வாய் கடகத்துக்கு வந்து நீசமாகிவிட்டதாக சிகாமணிகள் கதை சொல்கிறார்கள்.

ஜோதிட ஒரு சித்தர் மாமணியோ, சிவபெருமான் கண்ணை

திறந்துவிட்டார்' என்கிறார்.

அதற்கு ஒரு அறிவியல் விளக்கமும் அவர் பாணியில் வைக்கிறார்.

'சிவன் நெற்றிக்கண்ணை திறப்பதாக கற்பனையில் நான் பேசுவதாக நினைக்கலாம்.

விஞ்ஞானப்பூர்வமாகவே சொல்கிறேன். பொதுவாக, மண்ணை, கல், பாறைகளை 3 வகையாக பிரிக்கிறார்கள்.

இதில், திருவண்ணாமலை கற்கள், லாட்டரைட் வகையை சேர்ந்தது. கற்களிலேயே உயர்ந்த ரகமாகும். இந்த லாட்டரைட் மீது எவ்வளவு தண்ணீர் ஊற்றினாலும், உதிராது, உடையாது.

ஆனால், ஆயிரக்கணக்கான வருடம் நின்றுகொண்டிருந்த மலை, இன்று உதிர்ந்து போயிருக்கிறது. இது மக்களுக்கான எச்சரிக்கை பாடம்' என்று பயமுறுத்துகிறார்.

ஆனால், மண் சரிவுக்கு சாதகமோ, பாவசாபமோ இல்லை. அதற்கான அறிவியல் காரணம் வேறு.

வெள்ளத்தால் மட்டுமல்ல, சாதாரண மழையாலும் மலைப்பகுதிகளில் நிலச்சரிவு நடப்பது இப்போது சகஜமாகிவிட்டது.

மலைகளில், 45 டிகிரி கோணத்துக்கு மேலான சாய்வு பகுதிகளில், கட்டுமான திட்டங்களுக்கு தடை விதிக்கப்பட்டுள்ளன. ஆனால், திருவண்ணாமலை, சேலம், ஆத்தூரில் அதுபோன்ற மலைப்பகுதிகளில் அனுமதி இல்லாத கட்டடங்கள் கட்டப்படுகின்றன.

விதிமுமுறை அடிப்படையில் கட்டடங்கள் கட்டக் கூடாத பகுதிகள் எவை என்பதை அரசு வெளிப்படையாக அறிவிக்கவேண்டும் என பொதுமக்கள் எதிர்பார்க்கின்றனர்.

அதுமட்டுமல்ல, மலையின் சரிவுகளில் தடுப்பு சுவர் அமைத்து, அதன்பின் கட்டடம் கட்டப்பட்டால், நிலச்சரிவுகளை ஆரம்ப நிலையிலேயே தடுக்கப்படும்.