പാറുക്കുട്ടി നേത്യാരമ്മ

ഇതിഹാസത്തിലെ സ്ത്രീകൾ

-  കണക്കൂർ ആർ. സുരേഷ്കുമാർ

ബ്രിട്ടണിലെ ജോർജ്ജ് അഞ്ചാമൻ രാജാവ് കൈസർ-ഇഹിന്ദ് എന്ന പദവി നൽകി ആദരിച്ച ഒരു ധീര വനിതയാണ് “പാറുക്കുട്ടി നേത്യാരമ്മ'. കൊച്ചി രാജാവിന്റെ പത്നിയായിരുന്നു അവർ. ഭരണപാടവം കൊണ്ടും രാജ്യസ്നേഹം കൊണ്ടും വളരെ ശ്രദ്ധനേടേണ്ട ഒരു വിശിഷ്ട വ്യക്തിത്വമാണ് അവരുടേത്. എന്നാൽ ചരിത്ര പുസ്തകങ്ങളിൽ അവരുടെ പേര് വേണ്ടവിധം അടയാളപ്പെടുത്തിയിട്ടുണ്ടോ എന്ന കാര്യത്തിൽ സംശയമുണ്ട്.

ഒരു സ്ത്രീ ആയതാകാം കാരണം. അല്ലെങ്കിൽ സ്വന്തം പേരു കൊത്തിവച്ച സ്തംഭങ്ങൾ നിർമ്മിച്ച് നാടുനീളെ പ്രദർശിപ്പിക്കാൻ അവർ ശ്രമിച്ചിട്ടുണ്ടാവില്ല.

ഇക്കാലത്ത് ഒരു പഞ്ചായത്ത് പ്രസിഡനു പോലും നാട്ടിലെമ്പാടും സ്വന്തം പേരു കൊത്തിയ ഫലകങ്ങൾ കുത്തിനിർത്തുന്നതു കാണുമ്പോൾ പാറുക്കുട്ടി നേത്യാരമ്മയെ പോലുള്ളവരുടെ മഹത്വം നമ്മളോർക്കണം.

ശരിയായ രീതിയിൽ പദ്ധതികൾ രൂപപ്പെടുത്തുവാനും ചെലവുകൾ നിയന്ത്രിച്ചു രാജ്യത്തിന്റെ സാമ്പത്തിക ഭദ്രത ഉറപ്പുവരുത്താനും ഭരണാധികാരികൾ എത്തരത്തിൽ ശ്രദ്ധ ചെലുത്തണമെന്നതിന് ഈ മഹത് വ്യക്തിയുടെ ജീവിതം നല്ല ഉദാഹരണമാണ്.