ആ കൂടിക്കാഴ്ച വഴിത്തിരിവായി

വഴിത്തിരിവ് - മദനൻ മാഷ് പ്രശസ്തർ തങ്ങളുടെ ജീവിതത്തിൽ വഴിത്തിരി വായ സന്ദർഭങ്ങൾ ഇവിടെ പങ്ക് വയ്ക്കുന്നു.

- ഉമ ആനന്ദ്

മദനനെന്ന് കേൾക്കുമ്പോൾ പഴയ തലമുറക്കാർ ഓർക്കുക രമണന്റെ ചങ്ങാതിയെയാണ്. എന്നാൽ പുതിയ തലമുറയ്ക്ക് മദനനെന്നാൽ അനുഗൃഹീതനായ ചിത്രകാരനെയാണ് ഓർമ്മ വരിക. അതാണ് മലയാളി മനസ്സിൽ മദനന്റെ സ്ഥാനം. കഥയായാലും കവിതയായാലും നോവലായാലും മദനന്റെ വരയിലൂടെ മിഴിവാർന്ന കഥാപാത്രങ്ങൾക്ക് കണക്കില്ല. ഒരു പുരുഷായുസ്സ് മുഴുവൻ വരികളെ വരകളിലൂടെ മനോഹരമാക്കിയ മദനൻ മാഷ് തന്റെ ജീവിതത്തിലെ വഴിത്തിരിവുകൾ ഓർത്തെടുക്കുന്നു.

“ഞാൻ ജനിച്ചത് കണ്ണൂരാണെങ്കിലും വളർന്നത് കോഴിക്കോടാണ്. എന്റെ അച്ഛൻ പി.വി. നാരായണാചാരി വടകര ബി.ഇ.എം. ഹൈസ്കൂളിൽ ചിത്രകലാ അധ്യാപകനായിരുന്നു. അഞ്ച് മക്കളിൽ മൂന്നാമനായിരുന്നു ഞാൻ. പാരമ്പര്യ കലാകുടുംബമായിരുന്നു ഞങ്ങളുടേത്. മദന മോഹനൻ എന്നാണ് എന്റെ യഥാർത്ഥ പേര്. മദനൻ എന്നത് തൂലികാ നാമവും.

ഞങ്ങൾ താമസിച്ചിരുന്നത് വാടകവീട്ടിലായിരുന്നു. അവിടെ ഗുരുകുല സമ്പ്രദായത്തിൽ അച്ഛൻ ചിത്രകല പഠിപ്പിച്ചിരുന്നു. അന്നത്തെ ചുറ്റുപാടിലും ധാരാളം പേർ പഠിക്കാൻ വന്നിരുന്നു.

ഞാൻ കുട്ടിക്കാലം മുതലേ കണ്ടതും വളർന്നതും ചിത്രങ്ങൾക്കുള്ളിലായിരുന്നു. അച്ഛനിൽ നിന്ന് തന്നെയാണ് ഞാനും ചിത്രകല പഠിച്ചത്. അല്ലാതെ ഒരു ആർട്ട് സ്കൂളിലും പഠിച്ചിട്ടില്ല.