സാറ ബർട്ട്മാൻ

ഇതിഹാസത്തിലെ സ്ത്രീകൾ

-  കണക്കൂർ ആർ. സുരേഷ്കുമാർ

1789-ൽ തെക്കു പടിഞ്ഞാറൻ ആഫ്രിക്കയിലെ തദ്ദേശീയരായ ഖോഖോയ ജനിച്ച നാടോടി ഇടയഗോത്രത്തിൽ സാറ ബർട്ട്മാൻ എന്ന സ്ത്രീയുടെ ജീവിതകഥ സാങ്കല്പിക കഥകളെ വെല്ലുന്നതാണ്.

നൂറ്റാണ്ടുകൾ മുമ്പ് മുതൽ യൂറോപ്യൻ രാജ്യങ്ങളിൽ നിലനിന്നിരുന്ന ഫ്രീക്ക് ഷോ എന്ന വലിയ മനുഷ്യാവകാശ വിരുദ്ധ പരിപാടിയിൽ വെറും പ്രദർശന വസ്തുവായി അവളെ ഉപയോഗിച്ചിരുന്നു.

ഖോഖോയ വംശരെന്ന് വിളിക്കപ്പെടുന്ന ഈ നാടോടി വർഗ്ഗത്തിൽ നിന്ന് പ്രദർശന ശാലയിൽ എത്തിക്കപ്പെടുന്ന അടിമസ്ത്രീകളെ ഹോട്ടാന്റോട്ട് എന്നാണ് യൂറോപ്യന്മാർ വിളിച്ചിരുന്നത്. പിൻ ഭാഗത്തും മുൻവശത്തും അസാമാന്യ വളർച്ചയുള്ള ഹോട്ടാന്റോട്ടുകളെ വിപുലമായി ശരീര പ്രദർശനത്തിന് ഉപയോഗിച്ചിരുന്നു. പലപ്പോഴും മനുഷ്യരായി അവരെ പരിഗണിച്ചതു പോലുമില്ല.

സൗത്ത് ആഫ്രിക്കയുടെ കിഴക്കേ മുനമ്പിലുള്ള നാടോടി ഗോത്രത്തിൽ സാ ജനിക്കുന്ന കാലഘട്ടത്തിൽ ആ പ്രദേശം ഡച്ച് കോളനിയായിരുന്നു. പിന്നീട് അത് ബ്രീട്ടിഷുകാരുടെ കൈവശമായി. അവൾക്ക് വീട്ടുകാരിട്ട പേരിനെക്കുറിച്ച് രേഖകളില്ല. സാറയുടെ ജനന ശേഷം കുറച്ചുകാലം കഴിഞ്ഞപ്പോൾ അവളുടെ അമ്മ മരിച്ചുപോയി. പിന്നീട് അവളുടെ അച്ഛനും ഗോത്രവൈരികളാൽ കൊല ചെയ്യപ്പെട്ടു.