ആർടെമിസ്

ഇതിഹാസത്തിലെ സ്ത്രീകൾ

- കണക്കുർ ആർ. സുരേഷ്കുമാർ

ഗ്രീക്ക് പുരാണത്തിലെ ദേവതമാരുടെ കഥകൾ രസകരമാണ്. അവരുടെ ദേവന്മാർക്കും ദേവതകൾക്കും കൃത്യമായ വകുപ്പുകളുണ്ടാകും. മരുഭൂമികൾക്കും വേട്ടയാടലിനും വന്യമൃഗങ്ങൾക്കും പ്രസവത്തിനും കുഞ്ഞുങ്ങളുടെ സംരക്ഷണത്തിനുമൊക്കെയുള്ള ഒരു ദേവതയാണ് ആർടെമിസ്. ചാന്ദ്രദേവതയായി കണക്കാക്കപ്പെടുന്ന ആർടെമിസ് ഘോര വനങ്ങളിൽ കറങ്ങി നടക്കുന്നതായി കരുതപ്പെടുന്നു. ആർടെമിസിന് തുല്യയായി ഡയാന എന്നൊരു റോമൻ ദേവതയുമുണ്ട്.

ഗ്രീക്ക് വിശ്വാസപ്രകാരം ആകാശത്തിന്റെ ദേവനായ സീയുസിന്റെയും  ലെതോ ദേവിയുടേയും മകളാണ് ആർടെമിസ്. അവളുടെ ഇരട്ടസഹോദരനാണ് അപ്പോളൊ ദേവൻ. സീയൂസിന്റെ മറ്റൊരു ഭാര്യയും ഒളിമ്പസിന്റെ രാജ്ഞിയുമായ ഹേര അവളുടെ ഭൂമികയിലെങ്ങും ലെതോയെ പ്രസവിക്കാൻ അനുവദിച്ചില്ല. എന്നാൽ ഒടുക്കം ഡെലോസ് ദ്വീപ് ലെതോയ്ക്ക് അഭയം നൽകി.