ഓൾഗ

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

പിതാവിന്റെ മരണ ശേഷം ഇഗോർ കിയെവിന്റെ സമീപമുള്ള ഗോത്രവർഗ്ഗങ്ങളെ കീഴടക്കി രാജ്യവിസ്തൃതി വർദ്ധിപ്പിച്ചു. കിയെവ് തലസ്ഥാനമാക്കി ഭരണം നടത്തി. ഒട്ടും കെട്ടുറപ്പില്ലാതെ പടുത്തുയർത്തിയ ആ ട്രൈബൽ ഫെഡറേഷൻ അറിയപ്പെട്ടത് കീവൻ റസ് എന്നായിരുന്നു.

യുദ്ധത്തിന്റെയും പോരാട്ടത്തിന്റെയും കഥകളിൽ ആരംഭിച്ച് പിന്നീട് ക്രിസ്തുമതം സ്വീകരിച്ച് ആത്മീയ മാർഗ്ഗത്തിലെത്തിയ കഥയാണ് ഓൾഗയുടേത്. കിവിലെ ഓൾഗ എന്ന് ചരിത്രത്തിൽ പേരു രേഖപ്പെടുത്തപ്പെട്ട ആ മഹത് വ്യക്തി ക്രിസ്തുമതം സ്വീകരിച്ച ശേഷം എലീന എന്ന പേരിലും അറിയപ്പെട്ടിരുന്നു. പിന്നീട് അവർ വിശുദ്ധയായി പ്രഖ്യാപിക്കപ്പെട്ടു. പ്രതികാരത്തിന്റെ രാജകുമാരി എന്നും ഓൾഗയെ വിശേഷിപ്പിക്കാറുണ്ട്.

ഓൾഗയുടെ ജനനത്തീയതി കൃത്യമയി രേഖപ്പെടുത്തപ്പെട്ടിട്ടില്ല. എങ്കിലും അത് എ.ഡി 890 നും 925-നും ഇടയിലാണെന്ന് കരുതുന്നു. വൈക്കിംഗ് വംശജയായ ഓൾഗ വടക്കുപടിഞ്ഞാറൻ റഷ്യയിലെ പ്ലക്കോവിൽ ജനിച്ചു എന്ന് കരുതപ്പെടുന്നു. പതിനഞ്ചു വയസ്സാകും മുമ്പ് അവളുടെ വിവാഹം കഴിഞ്ഞു. ഒരു കുലീന രാജവംശമായിരുന്ന റൂഡിക്കിഡ് രാജവംശത്തിന്റെ സ്ഥാപകനായ റൂ റിക്കിന്റെ മകനും രാജ്യത്തിന്റെ അനന്തര അവകാശിയുമായ ഇഗോർ ആണ് അവളെ വിവാഹം ചെയ്തത്. വിവാഹത്തിന് മുമ്പുള്ള ഓൾഗയുടെ ജീവിതത്തെ ക്കുറിച്ച് കാര്യമായ രേഖകൾ ലഭ്യമല്ല.